“Фарғона” чегара божхона пости ҳамда “Оқ-қия” божхона пункти узлуксиз ишлайдиган бўлди. Бу ҳақда Божхона қўмитаси матбуот хизмати хабар берди.
Қайд этилишича, 26 июлдан бошлаб Фарғона вилояти божхона бошқармасининг “Фарғона” чегара божхона пости ҳамда Шоҳимардонга кириш қисмида жойлашган “Оқ-қия” божхона пункти тун-у кун ишлаш режимига ўтказилди.
“Эндиликда Шоҳимардонга дам олгани бораётган фуқаролар ушбу божхона объектлари орқали исталган вақтда ҳаракатланиш имкониятига эга бўлди. Умид қиламизки, ушбу янгилик мамлакатимизда ички ва ташқи туризмнинг ривожланишига ўзига хос туртки беради”, дейилади хабарда.
Мазкур янгилик Шавкат Мирзиёев ва Садир Жапаровнинг 2024 йил 18 июль куни Тошкент шаҳридаги учрашувида эришилган келишувлар доирасида амалга ошди.
Қирғизистон президентининг Ўзбекистонга амалга оширган давлат ташрифи чоғида томонлар иккала давлат чегарасида жойлашган чегара божхона постларидан самарали фойдаланиш масаласини кўриб чиққан эди.
-MDBA82Oj.jpg)
Шундан сўнг, Ўзбекистон ва Қирғизистон божхона ҳамда чегара хизмати раҳбарлари Фарғона вилоятидаги чегара-божхона постлари фаолиятини биргаликда кўздан кечириб, янги божхона постларини ташкил этиш ва мавжудларидан самарали фойдаланиш, божхона постларида тирбандликларнинг олдини олиш борасида мавжуд имкониятларни таҳлил қилди.
Фарғонада 12 июль куни Шавкат Мирзиёев раислигида ўтказган йиғилишда “Водил” ва “Оқ-қия” чегара ўтказиш пунктлари халқаро мақомга эга эмаслиги сабаб хорижий туристлар Шоҳимардон ва Ёрдонга Ўш орқали айланиб ўтишга тўғри келаётгани айтилганди.
Президент бу борада қўшни мамлакат билан тегишли музокаралар олиб борилаётганини таъкидлаб, мутасаддиларга Шоҳимардон ва Ёрдон қишлоқлари, Водил шаҳарчасининг мастер режасини ишлаб чиқишни топширганди.
Изоҳ (0)