Бош прокурор Ниғматилла Йўлдошев 16 август куни Кураш федерацияси раислигига қайта сайланди.
Спорт вазирлиги матбуот хизматининг хабар қилишича, Кураш федерациясининг навбатдаги ҳисобот-сайлов конференцияси ўтказилиб, унда ташкилий масала ҳам кўриб чиқилди. Ниғматилла Йўлдошев делегатларнинг овоз бериши натижасида янги 5 йиллик муддатга мамлакат кураш федерацияси раислигига қайта сайланди.
У мазкур лавозимни 2019 йилнинг октябрида эгаллаганди. Унга қадар Ўзбекистон кураш федерациясини собиқ бош прокурор Отабек Муродов бошқарган.
Ниғматилла Йўлдошев 2019 йил 20 июнда Ўзбекистон бош прокурори этиб тайинланганди. Прокуратура тўғрисидаги қонунга кўра, бош прокурор ваколат муддати — 5 йил. Бош прокурорни лавозимига тайинлаш ҳамда лавозимидан озод этиш тўғрисидаги фармонлари Олий Мажлис Сенати томонидан тасдиқланади. 2024 йилнинг июнида у иккинчи муддатга бош прокурор лавозимига тасдиқланди.
Изоҳ (0)