Rossiya kuchlari 11-avgust kuni Zaporojye AESga hujum qilgan. Bu haqda Ukraina prezidenti Zelenskiy bergan maʼlumotga asoslanib, Reuters nashri xabar berdi.
Manbada aytilishicha, front nazorat chizig‘i atrofida joylashgan ukrain bo‘linmalari hujumni qayd etgan. Favqulodda holat xavfi yuzaga kelgach, Kiyevdagi hukumatga bu haqida xabar yetkazilgan.
Vladimir Zelenskiy AES hududidagi minoralardan biridan tutun chiqayotgani aks etgan videoni Telegram tarmog‘idagi kanaliga joylashtirgan. Uning so‘zlariga ko‘ra, stansiyada hozirda radiatsiya ko‘rsatkichlari normal. Rossiyani “shantaj uyushtirish” uchun stansiyaga hujum qilgani aytilgan.
“Rus bosqinchilari Zaporojye AESga hujum uyushtirishi oqibatida yong‘in chiqdi.
Hozirgi vaqtda radiatsiya ko‘rsatkichlari normal. Ammo rossiyalik terrorchilar atom stansiyasi ustidan nazoratni o‘z qo‘lida ushlab tursa, vaziyat og‘ir tomonga o‘zgarishi ham mumkin. Zaporojye AES tortib olingan birinchi kundan boshlab Rossiya undan Ukraina, butun Yevropa va dunyoni shantaj qilish uchun foydalanib kelmoqda.
Biz dunyoning reaksiyasini kutamiz, MAGATEning javobini kutamiz. Buning uchun Rossiya javobgar bo‘lishi kerak. Zaporojye stansiyasi ustidan faqat Ukraina nazorati o‘rnatilishigina AESda normal holatga qaytish va to‘liq xavfsizlikni kafolatlay oladi”, degan Zelenskiy holatga munosabat bildirib.
Zaporojyening bosib olingan qismlarini nazorat qilish uchun Rossiya tomonidan tayinlangan rasmiy Yevgeniy Balitskiy AESga hujumda Ukrainani ayblagan. Ukrain maxsus bo‘linmalari Energodar shahri va uning atrofidagi sanoat tuzilmalariga ham zarba bergani aytilgan.
Zelenskiy xalqaro hamjamiyatni Rossiyaga nisbatan choralar ko‘rishga chaqirgan. AES halokati mintaqa uchun xavfli bo‘lishi mumkinligi taʼkidlangan.
Izoh (0)