Уганда пойтахти Кампалада 11 август куни чиқинди полигонидан кўчки юз бериши оқибатида камида 21 киши ҳалок бўлган. Бу ҳақда Reuters нашри хабар берди.
Манбада айтилишича, сўнгги ҳафтада юз берган кучли ёмғирдан сўнг Кампала шаҳри ташқарисидаги чиқинди уюмида кўчки юз берган. Катта ҳажмли чиқинди уюмлари яқин атрофдаги аҳоли уйларини кўмиб ташлаган.
Кўчки юз берган пайтда аҳоли вакиллари хонадонларида ухлаётган бўлган. Шу боисдан ҳам тезкор ҳаракат қилиш ҳамда фуқароларни қутқариб қолишнинг имкони бўлмаган.
Мамлакат президент Ёвери Мусевени ахлатхона яқинида яшовчи барча фуқароларни тезкор равишда кўчиришни буюрган. Ҳалок бўлганларни тезкор суръатда қидиришни давом эттириш топширилган.
Ҳукумат, шунингдек, кўчки сабабларини текширишни бошлаган. Чиқинди полигонининг мустаҳкамлигига масъул бўлган шахслар тергов қилиниши ва тегишлича жавобгарликка тортилиши айтилган.
Полиция матбуот котиби Патрик Онянгонинг айтишича, ҳозиргача камида 14 киши чиқинди уюми остидан қутқариб олинган. Маҳаллий аҳоли яна ўнлаб фуқаролар уюм остида қолиб кетганини айтган.
Китези номи билан танилган полигон ўнлаб йиллар давомида Кампаланинг ягона чиқинди йиғиш ҳудуди бўлиб хизмат қилган. Чиқинди узоқ муддат давомида битта жойда тўпланиши оқибатида баланд тепалик ҳосил бўлган. Ушбу уюм ўзидан чиқарадиган бадбўй ҳид ва касалликлар туфайли мунтазам равишда аҳоли эътирозига сабаб бўлиб келган.
Изоҳ (0)