Грецияда 11 август куни юзага келган кенг миқёсли ўрмон ёнғинлари сабаб минглаб фуқаролар фавқулодда эвакуация қилинган. Бу ҳақда Reuters нашри хабар берди.
Манбада айтилишича, мамлакатдаги экстремал об-ҳаво шароити туфайли жанубдаги ўрмонларда ёнғин юзага келган. Ўрта Ер денгизи ҳудудидан иссиқ ҳаво массалари келиши эса ёнғинларни кучайтирган.
Ёнғинлар таъсири мамлакат пойтахти Афинада ҳам сезилган. Шаҳарнинг қатор кварталлари тутун ичида қолган. Тезкор қутқарув бригадалари аҳолини кўчириш учун жалб қилинган.
Греция бош вазири Кириакос Мицотакис фавқулодда вазият сабабли давлат таътилидан қайтган. Бош вазир буйруғи билан шарқий вилоятларда оммавий сафарбарлик бошланган. Кўплаб ҳарбий техникалар: самолёт ва вертолётлар ёнғинларни ўчириш учун жалб қилинган.
Сўнгги 24 соат ичида Грециянинг 40 та ҳудудида ўрмон ёнғинлари қайд этилган. Улардан 33 таси бартараф этилган. 7 та йирик ёнғин эса ҳануз давом этаётгани билдирилган.
Мамлакат фуқаро муҳофазаси вазири Вассилис Кикилиас мамлакатнинг қарийб ярмида юқори ҳарорат, шамол ва қурғоқчилик туфайли ёнғин хавфи юқори эканлиги ҳақида огоҳлантирган. Афина яқинидаги Шарқий Аттика минтақасида, Варнавас ҳудудидаги ёнғин тарқоқ қарағай ўрмонлари ҳудудига тарқалиб, катта ҳажмдаги қизил тутун тарқалишига олиб келган.
Ўт ўчириш ишларига ёрдамлашиш учун 400 дан ортиқ ўт ўчирувчи, 110 та машина, 29 та самолёт ва вертолётлар олиб келинган. Аланга баландлиги кўплаб ҳудудда 25 метрдан баландга кўтарилган.
Изоҳ (0)