Россия ҳукумати Украина ҳужуми сабаб Белгород вилоятидан аҳолини эвакуация қилишни бошлади 

Россия ҳукумати Украина ҳужуми сабаб Белгород вилоятидан ҳам аҳолини эвакуация қилишни бошлади. Бу ҳақда Россия маҳаллий нашрларига таяниб, Reuters нашри хабар берди.

Манбада айтилишича, Курскка кириб олган Украина бўлинмалари эндиликда унга қўшни Россия ҳудудларига ҳам таҳдид сола бошлаган. Бунинг оқибатида марказий ҳукумат қўшимча эвакуация режаси ишлаб чиқишга мажбур бўлган.

Украина билан чегарадош ва бевосита Украина аскарлари жанглар олиб бораётган Курск вилоятига қўшни бўлган Белгородда ҳам хавфсизлик билан боғлиқ вазият ёмонлашган. Вилоятга икки томонлама ҳужум уюштирилиши мумкинлиги борасида норасмий хабарлар тарқала бошлаган.

Белгород вилояти губернатори Вячеслав Гладков Красная Яруга тумани чегарасида Украина армиясининг шубҳали манёврлари кузатилганини хабар берган. Киев Белгородда Курскдаги каби операция амалга ошириши хавфи мавжудлиги сабаб аҳолини зудлик билан кўчириш бошланган.

“Ишончим комилки, ҳарбийларимиз юзага келган таҳдидни енгиш учун ҳамма нарсани қиладилар. Биз Красная Яруга туманида яшовчи одамларни хавфсиз жойларга кўчиришни бошлаймиз”, деган Белгород губернатори Гладков.

Маълумотларга кўра, Россия Курск, Брянск ва Белгород вилоятларида кенг қамровли хавфсизлик режимини жорий қилган. Ҳаво ҳужумига қарши қўшимча мудофаа тизимлари жойлаштирилган.

Россия расмийлари Белгород вилоятидан қанча тинч аҳоли вакили эвакуация қилинишини маълум қилмаган. Фавқулодда кўчириш режаси ҳозирча фақат Красная Яруга туманида амалга оширилиши эълон қилинган.