Дам олиш кунлари кузатилган нисбатан салқин об-ҳаводан сўнг, душанба кунидан бошлаб Ўзбекистон ҳудуди бўйича ҳаво ҳарорати яна кўтарила бошлайди, деб хабар бермоқда “Ўзгидромет”.
Маълум қилинишича, 12—15 август кунлари республика ҳудудининг катта қисмида кундуз кунлари ҳаво 37-40 даражагача, жанубда 42-43 даражагача исийди.
15 август куни салқин ҳавонинг яна бир қисми Ўзбекистоннинг шимоли-ғарбий ҳудудларига кириб келади. Қорақалпоғистон Республикаси ва Хоразм вилоятида ҳаво ҳарорати 28-33 даражагача пасаяди.
16 август, жума куни насбатан салқин ҳаво шарққа томон ҳаракатлана бошлайди ва ҳаво ҳароратининг пасайиши Ўзбекистоннинг барча ҳудудини қамраб олади. Ҳаво ҳарорати кундузи 33-36 даража, шимоли-ғарбий ҳудудларда 28-33 даража атрофида, республика жанубида 40 даражагача бўлади.
Ушбу кунларда Ўзбекистон ҳудуди бўйича қуруқ об-ҳаво сақланиб туради. Фақат 13 ва 15 август кунлари Қорақалпоғистон Республикаси ва Хоразм вилоятида айрим жойларда, шунингдек, 15—16 август кунлари Тошкент вилояти ва Фарғона водийси вилоятларининг айрим тоғли ҳудудларида қисқа муддатли ёмғир ёғиши мумкин.
Шамол 7-12 метр/секунд тезликда эсади, баъзи жойларда 15-20 метр/секундгача кучаяди, чанг-тўзон билан кузатилади.
Тошкентда ҳаво бир оз булутли, вақти-вақти билан ўзгарувчан бўлади, ёғингарчилик кутилмайди. Ҳарорат асосан кечалари 22-25 даражо, кундуз кунлари 12—15 августда 37-39 даража, 16 августда 34-36 даража бўлади.
Изоҳ (0)