Август ойида ҳаво ҳарорати июлдагидан пастроқ бўлади. Бироқ баъзи йилларнинг августларида ғайритабиий жазирамалар ҳам кузатилган. Бу ҳақда “Ўзгидромет” маълумот берди.
Ўзбекистонда август ойлари бўйича кузатувлар тарихидаги энг иссиқ ҳарорат 1947 йилда Термиз шаҳрида қайд этилган. Ўшанда жанубий минтақада ҳаво ҳарорати қарийб 46,3 даража иссиқ бўлган.
Тошкент шаҳрида эса метеорологик кузатувларнинг барча йилларидаги август ойлари учун энг иссиқ ҳаво 1944 йилда кузатилган бўлиб, ҳарорат 43,1 даражага кўтарилган.
Сўнгги 10 йилликда август ойидаги энг юқори ҳарорат 2019 йилда қайд этилган ва 41,8 даража иссиқ бўлган.
Иқлимшунос Эркин Абдулаҳатовнинг ёзишича, жорий йил 8 августдан 9 августга ўтар кечаси республиканинг катта қисмида аҳоли дим иссиқликдан азият чекади. Бундай ҳолат 7 августдан 8 августга ўтар кечасида ҳам кузатилди.
“Ўзгидромет”га кўра, 7 август соат 20:00 ҳолатига ҳам республиканинг марказий шаҳарларида ҳаво ҳарорати 30 даражадан юқори иссиқликни ташкил этмоқда. Айниқса, 9 августга ўтар кечасидаги тун мамлакатнинг йирик шаҳарларида совитиш тизимлари билан ҳимояланмаган аҳоли тунги уйқуларига таъсир этади. Бу кўплаб ҳудудларда намликнинг юқорироқ кўтарилиши ҳисобига “димиқиш” иссиқлик ҳиссиёти шароитини бермоқда, дея ҳолатни таҳлил қилган мутахассис.
Кутилмаларга кўра, 8—9 август кунлари ҳудудларда ҳаво ҳарорати 42 даражагача иссиқ бўлади.
Умуман олганда, бу йилги август ойининг иккинчи ва учинчи ўн кунликларида ҳарорат кундуз кунлари 30–38 даража атрофида бўлиши кутилмоқда.
Изоҳ (1)
Urganchda 47 gradus koʻrsatdikecha