Исроил бош вазири Нетаньяху ҳозирча истеъфога чиқиш нияти йўқлигини айтди

Исроил бош вазири Биньямин Нетаньяху токи ўз мамлакатига фойда келтирар экан, лавозимини тарк этиш нияти йўқлигини айтиб ўтди. У бу ҳақида Тime нашрига берган интервьюсида маълум қилди.

“Исроилни хавфсиз келажак ва фаровонликка олиб боришимга ишонмагунимча, мен ўз лавозимимда қоламан”, деди у.

Шу билан бирга, Тime нашрининг қайд этишича, исроилликларнинг 72 фоизи Нетаньяху ҳозир ёки Ғазо секторидаги можаро тугаганидан кейин истеъфога чиқиши керак, деб ҳисоблайди.

Нетаньяху ҳозир мамлакатни ҳимоя қилиш ва уни ғалаба сари етаклаш бўйича саъй-ҳаракатларни бошқараётганини таъкидлар экан “менимча, бу яқинлашмоқда”, деди.

Шу билан бирга, у келажакда “бош вазир бўлиб қолиши ҳақида қайғурмаслигини” қайд этди.

“Ўз ҳиссамни қўшишим мумкинлигини ҳис қилсам, буни қилишда давом этаман. Одамлар кетишимни хоҳламагунча қоламан... Бизда монархия йўқ, бизда демократия бор”, дейди у.

Сўнгги ойларда кўплаб исроилликлар ҳукуматнинг ҳаракатларидан, хусусан, Ғазо секторида гаровга олинган исроилликларни озод қилиш бўйича келишув йўқлиги сабабли норозилик билдирган. Шу муносабат билан мамлакатда мунтазам равишда норозилик намойишлари бўлиб ўтмоқда.