“Исроил ҳимояга ҳам, ҳужумга ҳам тайёр” — Нетаньяху

Исроил армияси ҳам мудофаа, ҳам ҳужум ҳаракатларига тайёр. Бу ҳақда Исроил бош вазири Биньямин Нетаньяху маълум қилди.

“Биз мудофаага ҳам, ҳужумга ҳам тайёрмиз. Биз душманларимизга зарба беряпмиз ва ўзимизни ҳимоя қила олишимизга ҳам ишончимиз комил”, деди у Тель-Авив чеккасидаги Тель-Ҳашомер ҳарбий базасига ташрифи чоғидаги чиқишида.

Аввалроқ Al Arabiya телеканали Эрон ва Ливаннинг “Ҳизбуллоҳ” ҳаракати ҲАМАС сиёсий бюроси раҳбари Исмоил Ҳаниянинг ўлдирилишига жавоб тариқасида 8—9 август кунлари Исроилга зарба бериши мумкинлигини маълум қилганди.

Шунингдек, Эроннинг нишонлари Қуддус ва Тель-Авивдаги ҳукумат бинолари, жумладан, бош вазир Биньямин Нетаньяху идораси ва парламент биноси бўлиши мумкинлиги хабар берилган.