Қозоғистон, Қирғизистон ва Ўзбекистон Қамбарота ГЕС-1 қурилиш ва эксплуатация лойиҳасини амалга ошириш мақсадида акциядорлик жамияти ташкил этмоқчи. Қирғизистон томонининг лойиҳадаги улуши ва устав капитали 34 фоизни, Қозоғистон ва Ўзбекистонники эса 33 фоизни ташкил қилади.
Тегишли уч томонлама ҳукуматлараро битим лойиҳаси Қозоғистонда “Очиқ ҳуқуқий ҳужжатлар” сайтида эълон қилинди. Қурилиш ва лойиҳани амалга ошириш муддати тугагач, Қамбарота ГЕС-1 акциялари ва активлари тўлиқ Қирғизистон мулкига ўтади.
“Лойиҳа доирасида томонлар ҳамкорлигининг асосий тамойиллари Қамбарота ГЕС-1 да ишлаб чиқариладиган электр энергиясининг ҳажмини томонлар белгилаган ташкилотлар томонидан кафолатли харид қилишдан иборат”, — дейилади ҳужжатда.
2023 йил январь ойида Қозоғистон, Қирғизистон ва Ўзбекистон энергетика идоралари раҳбарлари Норин дарёсида Қамбарота ГЕС-1 қурилиши лойиҳасини амалга ошириш бўйича йўл харитасини имзолаганди.
Қозоғистон Энергетика вазирлигининг фикрича, Қамбарота ГЕС-1 Қирғизистондаги энг йирик электр станцияга айланиши керак ва Марказий Осиё мамлакатларини электр энергияси билан таъминлайди, шунингдек, минтақанинг сув таъминотини барқарорлаштиради.
Аввалроқ Қирғизистон президенти Садир Жапаров Қамбарота ГЕС-1 қурилиши 5-6 миллиард долларга тушишини маълум қилганди.
Изоҳ (0)