Pokistonda minglab fuqarolar mamlakat sobiq bosh vaziri Imron Xonning ozod etilishini talab qilib, namoyishlar boshlab yubordi. Bu haqda Al Arabiya nashri xabar berdi.
Manbada aytilishicha, qamoqdagi sobiq bosh vazirning minglab tarafdorlari 5-avgust kuni mamlakatning shimoli-g‘arbiy qismida Imron Xon hibsga olingani bir yilligi munosabati bilan namoyishlar tashkil etgan. Namoyishga yig‘ilganlar sobiq rahbarning ozod qilinishini va siyosiy faoliyatga qaytarilishini talab qilgan.
Norozilik namoyishlari Imron Xonning “Adolat partiyasi” uyushmasi tomonidan tashkil etilgan. Bu harakatdan maqsad bosh vazir Shahboz Sharif hamda uning hukumatini yon berishga majbur qilish ekanligi aytilgan.
Imron Xonni qo‘llab-quvvatlagan namoyishlar Xayber-Paxtunxva viloyatiga qarashli Svabi shahrida o‘tkazilgan. Ushbu viloyatning ko‘pchilik aholisi hozirgi hukumatdan norozi hamda Imron Xon hokimiyatga qaytishini istaydi.
Svabi shahrida namoyishlar doirasida 10 000 nafardan ortiq namoyishchilar yig‘ilgan. Mahalliy hukumat vakillari norozilik ko‘lami kuchayib ketmasligi uchun Imron Xon tez fursatda ozod qilinishiga vaʼda bergan.
Xayber-Paxtunxva viloyati rahbari Amin Gundapur namoyishchilardan keyingi haftalarda Islomobodga yurishga tayyorlanishni so‘ragan. Chunki “Adolat partiyasi” kelasi oy boshida poytaxt Islomobodda katta norozilik namoyishi o‘tkazishni rejalashtirmoqda.
Maʼlumot o‘rnida, Imron Xon 2023-yilning 5-avgustida Islomobod sudi tomonidan korrupsiya ayblovi bo‘yicha 3 yillik qamoq jazosiga hukm qilingan edi. Ayblov Imron Xonning partiyadagi yetakchiligiga yakun yasay olmadi, xalq qo‘llovi davom etdi.
Izoh (0)