Бугун, 5 август куни Тошкент шаҳар жиноят ишлари бўйича Юнусобод тумани судида “Саидазиз медгородок” номи билан танилган Саидазиз Саидалиев ва яна 28 кишига нисбатан ҳукм ўқилмоқда. Бу ҳақда “Дарё” мухбири хабар берди.
Маълум қилинишича, гуруҳнинг асосий аъзоси Саидазиз Саидалиев Жиноят кодексининг 165-моддаси 3-қисми “а” ва “в” банди (товламачилик), 168-моддаси 4-қисми “а” ва “в” банди (фирибгарлик), 211-моддаси 3-қисми “а” ва “б” банди (пора бериш), 242-моддаси 1-қисми (жиноий уюшма ташкил этиш), 243-моддаси (жиноий фаолиятдан олинган даромадларни легаллаштириш), 277-моддаси 2-қисми “б” ва “в” банди (безорилик), 277-моддаси 3-қисми “а” банди (безорилик) билан айбли деб топилди. Шунга асосан, Саидалиевга нисбатан 20 йил муддатга озодликдан маҳрум қилиш жазоси тайинланди. Жазони умумий тартибли колонияда ўташ белгиланди.
Саидазиз Саидалиев 1987 йилда Тошкент шаҳрида туғилган. У қарздорлик ва бошқа муаммолари бўлган шахслар масаласини қонунни четлаб ўтган ҳолда ҳал қилиб бериш эвазига моддий жиҳатдан манфаатдор бўлиб келган. Фуқароларга таҳдид қилиб, пул маблағларини ноқонуний қўлга киритган.
Суд жараёнида судланувчилардан бири Жиноят кодексининг 168-модда 4-қисми “а” ва “в” банди яъни фирибгарликда айбланаётган Нуриддин Тўлаганов айбсиз деб топилиб, суд залидан озод қилиниши белгиланди.
Шунингдек, Жиноят кодексининг 165-модда 3-қисми "в" банди — товламачилик, 182-модда 2-қисми “а” банди яъни “Божхона тўғрисида”ги қонун ҳужжатларини бузишда айбланган Азиз Нурматовга нисбатан қўлланилган қамоққа олиш тарзидаги эҳтиёт чораси ҳам бекор қилиниб, унинг дарҳол суд залидан озод этилиши белгиланди.
Маълумотларга кўра, Саидазиз Саидалиев ва унинг шерикларидан жабрланганлар сони 30 нафардан ортиқ. Улар орасида тадбиркорлар ҳам бор.
Саидалиев ва бошқаларга оид жиноят иши юзасидан суд жараёни 2024 йил 11 июнда бошланганди.
Изоҳ (0)