Тожикистон ва Ўзбекистон Сарез кўли сувидан ичимлик сувига эҳтиёжларида фойдаланмоқчи

Ўзбекистон ва Тожикистон Сарез кўлидан ичимлик суви олиш масаласини муҳокама қилди.

3 август куни Душанбеда Тожикистон ва Ўзбекистон ўртасида Марказий Осиё трансчегаравий дарёлари сув ресурсларидан комплекс фойдаланиш бўйича қўшма ишчи гуруҳининг 7-йиғилиши бўлиб ўтди.

Тожикистон Энергетика ва сув ресурслари вазирлиги матбуот хизматининг хабар қилишича, унда минтақа мамлакатларини тоза ичимлик суви билан таъминлаш учун Сарез кўли сув ресурсларидан фойдаланиш масалалари, Тожикистон ва Ўзбекистон ўртасида сув хўжалиги соҳасида янги қўшма трансчегаравий лойиҳаларни амалга ошириш имкониятлари муҳокама қилинди.

Asia-Plus нашрининг ёзишича, Сарез сувидан икки давлатнинг ичимлик суви эҳтиёжлари учун фойдаланиш масаласи 2018 йилдаёқ Эмомали Раҳмон ва Шавкат Мирзиёев томонидан Тожикистон раҳбарининг Ўзбекистонга давлат ташрифи чоғида муҳокама қилинганди. Президентлар савдо-иқтисодий ҳамкорлик бўйича ҳукуматлараро қўшма комиссияга бу имкониятни ўрганиш бўйича топшириқ берганди.

Эмомали Раҳмон халқаро форумлардаги нутқларида Тожикистон чучук сув бўйича катта ресурсларига эгалигини бир неча бор таъкидлаб, Марказий Осиё мамлакатларини узоқ муддатли ичимлик суви билан таъминлаш учун Сарез кўлидан фойдаланишни таклиф қилган.

Республика ҳукумати ҳам Сарездан Осиёнинг бошқа мамлакатларига, хусусан, Эрон, Иордания ва Бирлашган Араб Амирликларига ичимлик суви етказиб беришни йўлга қўйишни таклиф қилган.