Топ-10 таликда атиги икки аёл: Голливуддаги энг кўп маош олувчи актёрлар гонорари маълум қилинди

Март ойида “Оскар” тақдирлаш маросимида ҳар бир сураткаш ўтказиб юборишни истамаган ягона юлдуз, шубҳасиз, Versace либосидаги Марго Робби эди.

Австралиялик актриса 2023 йилда энг кўп даромад келтирган “Барби” фильмида бош ролни ижро этган ва фильмга продюсерлик қилган. Бироқ ўтган йилда энг катта миқдорда гонорар олган юлдуз у эмас, балки Адам Сендлер бўлди. Ажабланарлиси, актёр иштирок этган бирорта фильм 2023 йилда машҳур бўлмаган ва ҳатто топ-10 таликка кирмаган.

“Асосий инстинкт” фильми юлдузи Шерон Стоун актёрларга бериладиган гонорарда аёл ва эркаклар ўртасида кескин фарқ мавжудлиги ҳақида аввал ҳам таъкидлаб ўтган эди. Актриса бир хил рол учун эркакларга14 баробар кўпроқ маош таклиф этилишидан шикоят қилган.

Бугунги кунда энг кўп гонорар олган Голливуд юлдузлари ўнталигига атиги икки нафар аёл киритилди: булар Марго Робби ва Женнифер Энистон. “Барби” юлдузи 59 миллион доллар ишлаб топганини инобатга олсак, у Адам Сендлер (73 миллион) дан кейин иккинчи ўринда турибди. Бу кўрсаткич билан Марго Том Круз (45 миллион доллар) ни ортда қолдирди. Демак, ижобий томонга ўзгаришлар бор.

Уч карра “Оскар” мукофоти соҳиби Мерил Стрип шундай дейди: “Ўтган асрга нисбатан ҳозирда оз бўлса-да, тараққиёт бор. Бугунги кунда дунёнинг энг нуфузли юлдузлари орасида аёллар юқори поғоналарни эгалламоқда”, деди у.

Forbes журнали маълумотларига кўра, Адам Сендлер 2023 йилда ҳафтасига 1,4 миллион доллар ишлаб топган, бу даромад унинг Happy Madison номли продюсерлик компанияси 2020 йилда Netflix билан тўртта фильм бўйича шартнома имзолагани туфайли ортди. Бироқ у Женнифер Энистон билан бирга иштирок этган “Қотиллик сири-2” фильми паст натижалар кўрсатди ва 2023 йилнинг биринчи ярмида энг кўп томоша қилинган фильмлар 40 талигига ҳам кира олмади.

Миллион доллар миқдорда гонорар олган биринчи актриса — британиялик юлдуз Элизабет Тейлор бўлган. Унга 1963 йилда “Клеопатра” фильмида бош ролни таклиф этишган. Лойиҳага рози бўлишни истамаган Тейлор ўта катта миқдорда маош — миллион доллар сўраган. Ажабланарлиси, студия бунга рози бўлган.

Уилл Смитга 2012 йилда “Қора либосдаги одамлар-3” фильми учун 100 миллион доллар, 2018 йилда Роберт Даунига “Қасоскорлар: Чексизлик уруши” фильмида “Темир одам” ролига қайтиши учун 75 миллион доллар тўланган. Голливуднинг барча даврлардаги энг катта маошлари ўнталигида фақат битта аёл бор: 2013 йилда “Гравитация” илмий-фантастик триллери учун Сандра Буллок 70 миллион доллар гонорар олган.

Сан Диего университети қошидаги телевидение ва кино соҳасида аёлларни ўрганиш маркази томонидан жорий йилда эълон қилинган статистик маълумотларга кўра, продюсерларнинг атиги 21 фоизини аёллар ташкил этади. Режиссёрларнинг 16 фоизи, сценарий муаллифларининг 17 фоизи аёллардир. Аммо гонорар миқдорини аниқлайдиган ҳамда фильм суратга олишда актёрларни ёллайдиган продюсерларнинг аксарияти эркаклардир. Шу сабабли Барби режиссёри Грета Гервиг “Оскар”га номзод бўлмагани учун кўплаб аёллар бундан ғазабланди. Эҳтимол, бу муаммо Кино академиясининг 67 фоизини эркаклар ташкил этиши билан боғлиқдир.

Дарҳақиқат, 2024 йил “Оскар” совриндори, “Бечоралар ва бахтсизлар” (117 миллион доллар) фильми юлдузи Эмма Стоун ҳам кучли 10 таликка кира олмади. Метт Деймон ва Бен Аффлек Nike кроссовкалари ҳақидаги “Ҳаво” фильми унчалик машҳур бўлмаганига қарамай, Эмма Стоунда кўпроқ даромад (42 ва 37 миллион доллар) олишди.

Шунингдек, топ-10 та юқори даромад олган юлдузлар рейтингига ҳар бири 41 миллион доллар ишлаб топган Жейсон Стейтем ва Леонардо Ди Каприо ҳамда 23 миллион доллар билан Дензел Вашингтон каби актёрлар ҳам киритилди.