Фарғона вилояти Риштон туманида бедарак йўқолган 14 ёшли қиз Андижондан топилди. Бу ҳақда вилоят ИИБ хабар берди.
Маълум қилинишича, 26 июль куни Риштон туманида яшовчи аёл вилоят ИИБга мурожаат қилиб, 2010 йилда туғилган қизи Муштарий Абдулахатова 24 июль куни соат 19:35 ларда яшаш хонадонидан номаълум томонга чиқиб кетиб, бедарак йўқолганини маълум қилган.
Қизнинг онаси шу куни ижтимоий тармоқ фойдаланувчиларига ҳам мурожаат қилиб, қизининг топилишида кўмак сўраган. Ҳолат юзасидан ишчи гуруҳ тузилиб, тезкор-суриштирув ишлари олиб борилди.
Натижада бедарак йўқолган қиз Андижон шаҳрида бемақсад юргани аниқланиб, ходимлар томонидан олиб келинди ва ота-онасига соғ-саломат ҳолатда топширилди.
Шу каби ҳолат Сирдарёда ҳам кузатилди
Сирдарёда 2010 йилда туғилган Шуҳратжонова Заҳро яшаш хонадонидан номаълум томонга чиқиб кетиб, бедарак йўқолган эди. Жиноят қидирув ходимлари томонидан олиб борилган тезкор-қидирув тадбирлари натижасида бедарак йўқолган Шухратжонова Заҳро Рустам қизи Тошкент шаҳри ҳудудида экани аниқланиб, ходимлар томонидан соғ-саломат топилган.
Бедарак йўқолган қизлар
Аввалроқ Жиззах вилояти Пахтакор туманида 17 ёшли қиз бедарак йўқолгани хабар қилинганди. Мусурмонова Чарос Камол қизи 2024 йил 29 май куни яшаш уйидан мактабга чиқиб кетиб бедарак йўқолган. У 2007 йилда Жиззах вилояти Пахтакор туманида туғилган.
Шунингдек, Сурхондарё вилояти Денов туманида 17 ёшли қиз бедарак йўқолганди. 2007 йил туғилган Маҳкамова Саврина Хуршедовна 2024 йил 28 май куни яшаш манзилидан номаълум томонга чиқиб кетиб, бедарак йўқолган.
Изоҳ (0)