Farg‘ona viloyati Rishton tumanida bedarak yo‘qolgan 14 yoshli qiz Andijondan topildi. Bu haqda viloyat IIB xabar berdi.
Ma’lum qilinishicha, 26-iyul kuni Rishton tumanida yashovchi ayol viloyat IIBga murojaat qilib, 2010-yilda tug‘ilgan qizi Mushtariy Abdulaxatova 24-iyul kuni soat 19:35 larda yashash xonadonidan noma’lum tomonga chiqib ketib, bedarak yo‘qolganini ma’lum qilgan.
Qizning onasi shu kuni ijtimoiy tarmoq foydalanuvchilariga ham murojaat qilib, qizining topilishida ko‘mak so‘ragan. Holat yuzasidan ishchi guruh tuzilib, tezkor-surishtiruv ishlari olib borildi.
Natijada bedarak yo‘qolgan qiz Andijon shahrida bemaqsad yurgani aniqlanib, xodimlar tomonidan olib kelindi va ota-onasiga sog‘-salomat holatda topshirildi.
Shu kabi holat Sirdaryoda ham kuzatildi
Sirdaryoda 2010-yilda tug‘ilgan Shuhratjonova Zahro yashash xonadonidan noma’lum tomonga chiqib ketib, bedarak yo‘qolgan edi. Jinoyat qidiruv xodimlari tomonidan olib borilgan tezkor-qidiruv tadbirlari natijasida bedarak yo‘qolgan Shuxratjonova Zahro Rustam qizi Toshkent shahri hududida ekani aniqlanib, xodimlar tomonidan sog‘-salomat topilgan.
Bedarak yo‘qolgan qizlar
Avvalroq Jizzax viloyati Paxtakor tumanida 17 yoshli qiz bedarak yo‘qolgani xabar qilingandi. Musurmonova Charos Kamol qizi 2024-yil 29-may kuni yashash uyidan maktabga chiqib ketib bedarak yo‘qolgan. U 2007-yilda Jizzax viloyati Paxtakor tumanida tug‘ilgan.
Shuningdek, Surxondaryo viloyati Denov tumanida 17 yoshli qiz bedarak yo‘qolgandi. 2007-yil tug‘ilgan Mahkamova Savrina Xurshedovna 2024-yil 28-may kuni yashash manzilidan noma’lum tomonga chiqib ketib, bedarak yo‘qolgan.
Izoh (0)