Исроил ташқи ишлар вазири Исроил Кац Туркия президенти Ражаб Тоййиб Эрдўғонни яҳудий давлатига бостириб кириш оқибатлари ҳақида огоҳлантирди. Бу ҳақда Deutsche Welle хабар берди.
“Эрдўғон Саддам Ҳусайн изидан бориб, Исроилга ҳужум уюштириш билан таҳдид қилмоқда. Шунчаки у ерда (Ироқда) нима бўлганини ва ҳаммаси нима билан тугаганини эсласин”, деди Кац.
Яҳудий амалдори тегишли баёноти билан Х ижтимоий тармоғида Туркия етакчиси ва Ироқ собиқ президенти фотосуратларини жойлаштирди.
Аввалроқ Эрдўғон Туркия бошқа давлатлар ва ҳудудлар билан ўтмишда бўлгани каби Исроилга ҳам “кириши” мумкинлигини айтганди. Сиёсатчи бундай қилмаслик учун “ҳеч қандай сабаб йўқ” эканини таъкидлаган.
“Биз Қорабоғга кирганимиздек, Ливияга кирганимиздек, улар билан ҳам шундай қиламиз. Бундай қилмаслигимиз учун ҳеч қандай сабаб йўқ... Биз бу қадамларни қўйиш учун кучли бўлишимиз керак”, деган эди Эрдўғон.
Изоҳ (0)