Европа ташқи ҳаракатлар хизматига (ЙТҲХ) жорий йил учун харажатларни 43 миллион еврога ёки бюджетнинг тахминан 5 фоизига қисқартириш бўйича кўрсатма берилди. Тегишли қарор дипломатларнинг харажатлар лимитини сезиларли даражада ошириб юборгани билан боғлиқ. Бу ҳақда европалик дипломатларга таяниб, Financial Times хабар берди.
Дипломатларга сафарларнинг бир қисмидан воз кечиш, зиёфатларни бекор қилиш ва ўз қароргоҳларининг хавфсизлигини таъминлаш бўйича ишларни кейинга қолдириш буюрилган. Келгуси йилда ҳам Европа ташқи ҳаракатлар хизмати бюджетни янада қисқартиши кутилмоқда. Бу Европа Иттифоқининг Африка ва Лотин Америкаси каби минтақаларда дипломатик иштирокини қисқартиришга олиб келиши мумкин.
ЙТҲХ келгуси йил учун бюджет режаси “қаттиқ тежаш чораларини” кўзда тутиши, бу эса мол-мулкни сотишга ва ҳатто ваколатхоналарни ёпишга ҳам олиб келиши мумкинлигини тан олган. Ҳозирги вақтда ЙТҲХ бутун дунё бўйлаб 145 та ваколатхонага эга, жумладан, Ватикан ва Барбадосда ваколатхоналари мавжуд.
Масъулларнинг сўзларига кўра, ЙТҲХ бюджет тугаши муносабати билан БМТ бош ассамблеясидаги йиллик қабулни бекор қилишга мажбур бўлган.
“Бундан ташқари, 50 га яқин хорижий ваколатхоналар хавфсизлик билан жиддий муаммоларга дуч келмоқда, аммо идорада эшик қулфларини янгилаш, деразаларга панжаралар ва кузатув камераларини ўрнатиш учун маблағ йўқ”, — дейилади хабарда.
Европа иқтисодий комиссияси бош котиби Стефано Саннино март ойида маблағ етишмаслигини ва бюджетнинг 7,1 фоизга ўсиши Европа Иттифоқидаги инфлация даражасини ҳам қопламаслигини айтганди.
Изоҳ (0)