Исроил бош вазири Биньямин Нетаньяху АҚШ Конгрессида нутқ сўзлаб, фаластинликларни “дерадикаллаштириш”га чақирди ва Эронга қарши баёнот берди. Бу ҳақда Euronews хабар берди.
“Бугун биз тарих чорраҳасида турибмиз. Бизнинг дунёмиз ларзага тушмоқда. Яқин Шарқда террорнинг Эрон ўқи Америка, Исроил ва бизнинг араб дўстларимизга қарши турибди. Цивилизация кучлари ғалаба қозониши учун Америка ва Исроил биргаликда туриши керак. Шунда биз ютамиз, улар ютқазади”, дея у нутқини бошлади.
Яҳудий давлати бош вазири Исроилга янги ҳарбий ёрдам пакетини ажратишни сўради. У гаровга олинганларни озод қилиш ва ўт очишни тўхтатиш бўйича келишув муваффақиятли бўлишига “ишончи комил” эканини айтди.
Нетаньяху президент Жо Байденнинг гаровга олинганлар ва уларнинг оилаларини ҳимоя қилиш йўлидаги “тинимсиз саъй-ҳаракатлари” учун миннатдорлик билдирди. Нутқнинг иккинчи қисмида, у собиқ президент Дональд Трампга Исроил ва БАА/Баҳрайн ўртасида келишувлар имзоланишидаги роли учун миннатдорлигини айтди.
Нетаньяху “университет кампуслари ва бутун Қўшма Штатларда антисемитизм кучайиб бораётганини” қоралади. У Халқаро жиноий суд прокурори Карим Хонни Исроил Ғазо секторида қасддан очарчилик келтириб чиқараётганини айтгани учун қоралади.
Бош вазир агар анклавда очарчилик мавжуд бўлса, бу “Исроил озиқ-овқат етказиб беришни блоклаётгани учун эмас, балки ҲАМАС уни талон-тарож қилаётгани учун” эканини даъво қилди.
БМТ маълумотларига кўра, Ғазо аҳолисининг 96 фоизи ҳозирда “озиқ-овқат хавфсизлигининг жиддий етишмовчилиги”га дуч келмоқда.
Нетаньяхунинг фикрича, Ғазода “Исроилни йўқ қилишга интилмайдиган” фаластинликлар бошқарадиган фуқаролик маъмурияти бўлиши лозим.
“Фаластинликларнинг кейинги авлоди ъяҳудийлар билан бирга яшашни ўрганишиъ лозим”, деди у ва “дерадикализация”га чақириб, ҳозирги вазиятни Иккинчи жаҳон урушидан кейин Япония ва Германияда содир бўлган воқеалар билан солиштирди.
80 га яқин демократ қонунчилар Ғазодаги гуманитар фалокат ва Исроил операцияси бошланганидан бери қурбонлар сони 40 мингга яқинлашаётгани ҳақида хабар бериб, нутқни бойкот қилишга қарор қилди.
- Нетаньяхунинг келиши Вашингтонда норозиликларни келтириб чиқарди. Яҳудий давлати бош вазирига Конгресс минбаридан чиқиш имкони берилганидан норози бўлган минглаб намойишчилар урушни тўхтатиш ва гаровга олинганларни қайтаришни талаб қилди.
Изоҳ (0)