Филиппин соҳиллари яқинида 25 июль куни 1500 тоннадан ортиқ нефтни олиб кетаётган улкан танкер чўкиб кетган. Бу ҳақда BBC нашри хабар берди.
Манбада айтилишича, Филиппин байроғи остидаги MT Terra Nova танкери номаълум сабабга кўра чўка бошлаган. Расмийларнинг бир гуруҳи бунга кема ичидаги ёнғин сабаб бўлганини айтган бўлса, яна бир гуруҳ мутахассислар ҳалокатга сабаб сифатида денгизда юз бераётган тўфонларни келтирган.
Ҳозирга қадар танкер ичида бўлган 16 нафар экипаж аъзоси қутқариб олинган. Бир нафар ходим бедарак йўқолгани хабар қилинган ва уни топиш учун қутқарув гуруҳи ташкил этилган.
Танкер бошқаруви вакили Хайме Баутиста ҳолат юзасидан баёнот бериб, танкердан нефть сизиб чиқиши кузатилганини айтган. Денгиздаги кучли шамол ва баланд тўлқинлар эса расмийларнинг бунга қарши жавоб чоралари кўришига халақит бермоқда.
MT Terra Nova кемаси Филиппиннинг марказий Илоило шаҳрига кетаётган бўлган. Кема чўка бошлагач эса бир неча километр ҳудудга нефть оқиб кетган.
“У ағдарилиб, охир-оқибат сувга чўкиб кетди. Кемада катта захира бор. У денгизга тўкилса жиддий муаммо бўлади”, дейилган Филиппин қирғоқ назоратчилари хабарида.
Кўплаб Филиппин расмийлари кўрфазнинг нефть билан ифлосланишидан хавотир билдирган. Чунки чўккан кеманинг захираси улкан бўлиб, мамлакат тарихидаги энг йирик нефтдан ифлосланиш ҳодисасига олиб келиши ҳамда денгиз ҳаракатини чеклаб қўйиши мумкин.
2023 йил март ойида ҳам Шарқий Миндоро провинцияси қирғоқларида 800 минг литр ҳажмида саноат ёнилғисини олиб кетаётган нефть танкери чўкиб кетган. Оқибатда нефть яқин атрофдаги бир нечта балиқчи қишлоқлари соҳилларигача етиб борган ва қирғоқбўйини қоплаб олган. Нефть қоплаши оқибатида соҳил ҳайвонлари ва қушлари қирилиб кетган, аҳоли бошқа ҳудудга кўчирилган.
Изоҳ (0)