АҚШ президенти Жо Байден демократияни сақлаб қолиш учун президентлик пойгасидан чиқишга қарор қилганини айтди. Бу ҳақда у Америка халқига қилган мурожаатида маълум қилди.
Президент сифатида эришган ютуқларим, дунёдаги етакчилигим, Америка келажаги ҳақидаги тасаввурларим иккинчи муддатга сайланиш учун лойиқ деб ҳисоблайман, лекин ҳеч нарса, жумладан, шахсий амбициям ҳам демократиямизни сақлаб қолиш йўлида тўсқинлик қила олмайди, олға боришнинг энг яхши йўли эстафетани янги авлодга топшириш, бу халқимизни бирлаштиришнинг энг яхши усули, деган қарорга келдим, деди у.
У қолган олти ой ичида ўзининг президентлик вазифаларига: иқтисодий ўсишни таъминлаш, фуқаролар ҳуқуқларини ҳимоя қилиш ва бошқаларга эътибор қаратишини таъкидлади. Байден АҚШ Украинага ёрдам бераётган давлатлар коалициясини бирлаштириш ва НАТОни мустаҳкамлашда давом этишини айтди. Ғазо секторидаги ҳарбий ҳаракатларга чек қўйиш ва барча гаровга олинганларни озод қилиш ниятида эканини қўшимча қилди. Байден XXI асрда мамлакати ҳеч бир урушга аралашмаган биринчи АҚШ президенти эканини айтди.
У бўлажак овоз беришда ўз танловини аллақачон қабул қилгани, бу вице-президент Камала Ҳаррис экани таъкидлаб, уни президентликка номзод сифатида қўллаб-қувватлашга чақирди.
Байден сайловда қатнашмайди
21 июль куни Жо Байден президентлик сайловидан ўз номзодини қайтариб олди. Сиёсатчи партия ва мамлакат манфаатларига асосан шундай қарорга келганини айтди.
Сизнинг президентингиз сифатида хизмат қилиш ҳаётимдаги энг катта шараф бўлди. Мен қайта сайланиш ниятида бўлган бўлсам-да, ўз партиям ва мамлакатим манфаатларига кўра, номзодимни рад этишим ва қолган муддат давомида фақат президентлик вазифамни бажаришга эътибор қаратишим керак деб ҳисоблайман, деган у.
Байден президентлик пойгасида Камала Ҳаррисни тўлиқ қўллаб-қувватлашини билдирган. Унинг таъкидлашича, демократлар Трампни сайловларда мағлуб этиш учун ҳозир бирлашиши керак.
АҚШ Конгресси Вакиллар палатаси спикери Майк Жонсон қарор ортидан Байденни истеъфога чиқишга чақирган. Унинг фикрича, кейинги муддатга президент бўлишни истамаган одам ҳозир бу лавозимни эгалламаслиги лозим.
Изоҳ (0)