АҚШ президенти Жо Байден сайловдан номзодини олиб ташлаганидан кейин илк бор оммага кўриниш берди. Бу ҳақда Independent маълум қилди.
Байденнинг шифокори Кевин O’Коннор президент аллақачон коронавирусга манфий тест топширганини айтди. Шунга қарамай АҚШ президенти назорат остида қолиши таъкидланди. Оқ уй матбуот хизматига кўра, Байден Делавер штатида изоляциядан сўнг иш жойига қайтади. Маҳаллий телеканаллар АҚШ президенти самолётга чиққанини тасвирга олган.
The Washington Post нашрининг ёзишича, Байден 24 июль куни Оқ уйда нутқ сўзлаши керак. У президентлик пойгасидан чиқишга қарор қилганини айтади ва америкаликларга бу лавозимдаги фаолиятини қандай якунлашни режалаштираётганини маълум қилади.
Эслатиб ўтамиз, ўтган ҳафта АҚШ президенти Жо Байден COVID-19 учун ижобий тест топширганди. Шундан сўнг сиёсатчи Делаверга изоляцияга кетган.
Байден сайловда қатнашмайди
21 июль куни Жо Байден президентлик сайловидан ўз номзодини қайтариб олди. Сиёсатчи партия ва мамлакат манфаатларига асосан шундай қарорга келганини айтди.
“Сизнинг президентингиз сифатида хизмат қилиш ҳаётимдаги энг катта шараф бўлди. Мен қайта сайланиш ниятида бўлган бўлсам-да, ўз партиям ва мамлакатим манфаатларига кўра, номзодимни рад этишим ва қолган муддат давомида фақат президентлик вазифамни бажаришга эътибор қаратишим керак деб ҳисоблайман”, деган у.
Байден президентлик пойгасида Камала Ҳаррисни тўлиқ қўллаб-қувватлашини билдирди. Унинг таъкидлашича, демократлар Трампни сайловларда мағлуб этиш учун ҳозир бирлашиши керак.
АҚШ Конгресси Вакиллар палатаси спикери Майк Жонсон қарор ортидан Байденни истеъфога чиқишга чақирди. Унинг фикрича, кейинги муддатга президент бўлишни истамаган одам ҳозир бу лавозимни эгалламаслиги лозим.
Изоҳ (0)