АҚШ Украина учун 225 миллион долларлик янги ёрдам пакети ажратган. Бу ҳақда Оқ Уй тарқатган хабарга асосланиб, Reuters нашри хабар берди.
Янги ҳарбий пакет ажратилиши Украина раҳбари Зеленскийнинг АҚШга ташрифи доирасида эълон қилинган. НАТО саммити доирасида йиғилган Ғарб ҳукуматлари раҳбарлари Киевга ёрдам давом эттирилишини маълум қилишган.
Қўшма Штатлар раҳбарияти 11 июль куни эълон қилган ҳисоботда Украина учун аталган пакетнинг тафсилотлари ошкор қилинган. Унга кўра, навбатдаги ёрдам тўплами Патриот ракета батареялари, юқори ҳаракатчан артиллерия ва ракета тизимлари учун қўшимча ўқ-дорилар ва бошқа техник жиҳозларни ўз ичига олади.
Вашингтондаги саммит олдидан Зеленский ва Байден учрашуви ўтказилган. Унда АҚШ раҳбари кичик ҳажмли таъминот пакетлари ҳар ой мунтазам равишда Киев учун ажратилишига ваъда берган. Ҳозирчалик Оқ Уй фақат техник жиҳозлар етказиб бериши, стратегик қуроллар жўнатиш борасида эса муҳокамалар давом этаётгани билдирилган.
Маълумотларга кўра, Вашингтон 2022 йилдан бери Киевга 50 миллиард доллардан ортиқ ҳарбий ёрдам кўрсатган. 2024 йилнинг қиши давомида эса бу ёрдам бир неча ойга тўхтади. Оқибатда эса Киевнинг захира қуролларида тақчиллик юзага келди.
Қурол захирасини тўлдиришга уринган Украина бир неча бор НАТО раҳбариятига мурожаат билан чиққан эди. Жорий йилнинг апрель ойида АҚШ Зеленскийнинг талабини қондириб, Украина учун 61 миллиард долларлик пакет ажратган.
“Биз сиз билан қоламиз. Киевни қўллаш охиригача давом этади”, — деган Байден Зеленский билан сўнгги учрашуви чоғида.
Изоҳ (0)