Экология, атроф-муҳитни муҳофаза қилиш ва иқлим ўзгариши вазирлиги ҳузуридаг “Ҳисор” давлат қўриқхонасида ўрнатилган фотоқопқонга қор қоплони муҳрланди.
Қайд этилишича, сўнгги ўн йилликлар давомида қор қоплонининг сони узлуксиз камаймоқда. Ҳозирда Ўзбекистонда бу ҳайвоннинг умумий кўрсаткичи турли ҳисоб-китобларга кўра, 30-50 тадан 80-120 тагачани ташкил этади. Ғарбий Тян-Шанда 10-40 тагача, Помир-Олойда 20-80 тагача қор қоплони қайд этилган.
Халқаро табиатни муҳофаза қилиш иттифоқи (ТМХИ) Қизил рўйхати ва Ўзбекистон Қизил китобига йўқ бўлиб кетиш арафасида турган, локал тарқалган тур сифатида киритилган. Шунингдек, йўқ бўлиб кетиш хавфи остидаги ёввойи фауна ва флора турлари билан халқаро савдо қилиш тўғрисидаги конвенция (CITES) рўйхатидан жой олган.
Фотоқопқонга муҳрланган ноёб ҳайвонлар
2023 йилнинг сентябрь охирларида “Зомин” давлат қўриқхонасига ўрнатилган фотоқопқонга “Арча майдон” ҳудудида сайр қилиб юрган она-бола Туркистон силовсини тушиб қолгани маълум бўлган эди. 2022 йилнинг октябрь ойида “Сурхон” давлат қўриқхонасига ўрнатилган фотоқопқонга манул тушиб қолганди. Шунингдек, “Ҳисор” давлат қўриқхонаси қўриқлаш ходимлари томонидан ўрнатилган фотоқопқон объективига Туркистон силовсини, “Чотқол” давлат биосфера қўриқхонасида эса қор қоплони муҳрлангани тўғрисида хабар берилганди.
Изоҳ (0)