“Барселона” Нико Уильямсни қўлга киритиш учун асосий таркибдаги 3 футболчини сотади

Каталониянинг “Барселона” клуби 21 ёшли “Атлетик Бильбао”нинг испаниялик вингери Нико Уильямсни ўз сафига қўшиб олиш ниятида. Бу ҳақда Cadena Cer журналисти Санти Овале Х ижтимоий тармоғида (собиқ Twitter) хабар берди.

Манбага кўра, Испания терма жамоаси вингери билан шартнома имзолаш учун Каталония жамоаси асосий таркибнинг 3 нафар футболчисини сотиши мумкин. Улар орасида голландиялик ярим ҳимоячи Фрeнки де Йонг, бразилиялик вингер Рафинья ва уругвайлик марказий ҳимоячи Роналд Араухо бор.

Аввалроқ ОАВда “Барселона”дан ташқари Лондоннинг “Челси” клуби ҳам Нико Уильямсни трансфер қилиш ниятида экани ҳақида хабарлар пайдо бўлганди. Шунингдек, унинг терма жамоадаги шериклари футболчини ўз клублари сафига тортишга ҳаракат қилаётгани айтилмоқда.

Маълумот учун, жорий мавсумда футболчи Бильбаонинг “Атлетик” жамоаси сафида барча мусобақаларда 37 та ўйин ўтказиб, 8 та гол ва 17 та голли узатмага муаллифлик қилган. Футболчининг испан клуби билан шартномаси 2027 йилнинг июнь ойи охиригача амал қилади. Transfermarkt интернет порталига кўра футболчининг тахминий нархи 60 миллион еврони ташкил қилади.