Ёшлар ишлари агентлиги томонидан амалга оширилаётган “Мутолаа” лойиҳаси доирасида ишлаб чиқилган кўп функцияли мобил илова 500 мингдан ортиқ марта юклаб олинган. Бу ҳақда “Мутолаа” лойиҳаси ўзининг ижтимоий тармоқлардаги саҳифаларида хабар бермоқда.
“50 кишидан ортиқ жамоамиз, бизни қўллаб-қувватлаган Ёшлар ишлари агентлиги ҳамда ҳомий Халқ Банки, сизга бугун муҳим маррани забт этганимизни эълон қилмоқчимиз!” — дейилади эълонда.
2024 йилнинг февраль ойидан бошлаб ишлаб чиқилган “Мутолаа” жамоаси ўзбек тилидаги китобларни ягона платформада тизимли шаклда, юқори сифатда тўплашни ният қилган.
Шу кунгача 2000 га яқин китоблар электрон ва аудио форматларда иловага жойланган.
Жамоа ўз меҳнати маҳсули бўлган илова ярим миллион марта юклаб олингани ҳақидаги постда яна шундай дейди:
“Иловамиздаги айрим бўлим ва элементларни жами 7 марта қайта дизайн қилдик, турли техник функцияларни бир неча бор яхшилаб, турли экспериментлар қилиб, иловани 10 марта update қилдик.
7 та овоз ёзиш студиясида 20 га яқин сухандон-актёрлар билан бир ой давомида 500 соатдан ортиқ ҳажмдаги аудиокитоблар тайёрланмоқда. Биз 4 ойда овозлаштирган китобларимиз сони, яқин ўн йиллар ичида қилинган умумий аудиокитоблар сонидан ошиб кетди. Биз бу рақамларга сифатни бой бермаган ҳолда эришдик.
Бунга жамоамиздаги катта мотивация, жаҳонга чиқадиган ed-tech лойиҳани яратишга бўлган иштиёқ, меҳнаткашлик, фидоийлик, гоҳида кечқурунги уйқудан ҳам воз кечиш ва деярли ҳар бир дақиқа ушбу улкан мақсад ҳақида ўйлаш, изланиш, хато ва камчиликлар устида ишлаш, фикр алмашиш билангина эришилди.”
24 июнь санасидаги маълумотларга кўра, илова юкланишлари сони 560 мингдан ошган. Китобларни овозлаштиришга машҳур, истеъдодли актёрлар ва сухандонлар, жумладан, Маҳмуд Исмоилов, Боир Холмирзаев, Дилдора Рустамова кабилар жалб қилинаётгани ва илованинг техник имкониятлари туфайли ҳам Android, ҳам iOS операцион тизимларида ишлайдиган мобил қурилмаларга иловани ўрнатиб олиш кўпаймоқда.
Изоҳ (0)