Yoshlar ishlari agentligi tomonidan amalga oshirilayotgan “Mutolaa” loyihasi doirasida ishlab chiqilgan ko‘p funksiyali mobil ilova 500 mingdan ortiq marta yuklab olingan. Bu haqda “Mutolaa” loyihasi o‘zining ijtimoiy tarmoqlardagi sahifalarida xabar bermoqda.
“50 kishidan ortiq jamoamiz, bizni qo‘llab-quvvatlagan Yoshlar ishlari agentligi hamda homiy Xalq Banki, sizga bugun muhim marrani zabt etganimizni e’lon qilmoqchimiz!” — deyiladi e’londa.
2024-yilning fevral oyidan boshlab ishlab chiqilgan “Mutolaa” jamoasi o‘zbek tilidagi kitoblarni yagona platformada tizimli shaklda, yuqori sifatda to‘plashni niyat qilgan.
Shu kungacha 2000 ga yaqin kitoblar elektron va audio formatlarda ilovaga joylangan.
Jamoa o‘z mehnati mahsuli bo‘lgan ilova yarim million marta yuklab olingani haqidagi postda yana shunday deydi:
“Ilovamizdagi ayrim bo‘lim va elementlarni jami 7 marta qayta dizayn qildik, turli texnik funksiyalarni bir necha bor yaxshilab, turli eksperimentlar qilib, ilovani 10 marta update qildik.
7 ta ovoz yozish studiyasida 20 ga yaqin suxandon-aktyorlar bilan bir oy davomida 500 soatdan ortiq hajmdagi audiokitoblar tayyorlanmoqda. Biz 4 oyda ovozlashtirgan kitoblarimiz soni, yaqin o‘n yillar ichida qilingan umumiy audiokitoblar sonidan oshib ketdi. Biz bu raqamlarga sifatni boy bermagan holda erishdik.
Bunga jamoamizdagi katta motivatsiya, jahonga chiqadigan ed-tech loyihani yaratishga bo‘lgan ishtiyoq, mehnatkashlik, fidoiylik, gohida kechqurungi uyqudan ham voz kechish va deyarli har bir daqiqa ushbu ulkan maqsad haqida o‘ylash, izlanish, xato va kamchiliklar ustida ishlash, fikr almashish bilangina erishildi.”
24-iyun sanasidagi ma’lumotlarga ko‘ra, ilova yuklanishlari soni 560 mingdan oshgan. Kitoblarni ovozlashtirishga mashhur, iste’dodli aktyorlar va suxandonlar, jumladan, Mahmud Ismoilov, Boir Xolmirzayev, Dildora Rustamova kabilar jalb qilinayotgani va ilovaning texnik imkoniyatlari tufayli ham Android, ham iOS operatsion tizimlarida ishlaydigan mobil qurilmalarga ilovani o‘rnatib olish ko‘paymoqda.
Izoh (0)