Ўзбекистоннинг қатор ҳудудларида акциз маркасиз тамаки ва истеъмолга яроқсиз алкоголь маҳсулотларини муомалага киритилишининг олди олинди. Бу ҳақда Прокуратура департаменти хабар берди.
Унга кўра, Бош прокуратура ҳузуридаги департаментнинг Китоб туман бўлими, вилоят божхона бошқармаси ва ИИБ ходимлари ҳамкорлигида ўтказилган тезкор тадбирда тамаки маҳсулотлари савдоси билан шуғулланиб келган фуқаро А.Н. яшаш хонадонида 7 турдаги хорижда ишлаб чиқарилган жами 1 680 қути акциз маркасиз тамаки маҳсулотларини сотиш учун сақлаб келгани аниқланиб, ушбу маҳсулотлар ашёвий далил сифатида олинган.
Департаментнинг Олмалиқ шаҳар бўлими томонидан ўтказилган тезкор тадбирда фуқаро М.Н. ноқонуний даромад орттириш мақсадида Интизор кўчасида фуқаро Ш.А.га 6 турдаги жами 726 дона қалбаки акциз маркали алкоголь маҳсулотларини 72,9 миллион сўмга сотган вақтида ашёвий далиллар ушланган.
Шунингдек, департаментнинг Поп туман бўлими томонидан ўтказилган тезкор тадбирда “П.с.ҳ.” МЧЖ савдо шохобчасида 10 турдаги жами 221 дона истеъмолга яроқсиз алкоголь ва 39 турдаги жами 535 қути акциз маркасиз тамаки маҳсулотлари сотувга қўйилгани аниқланиб, ушбу маҳсулотлар ашёвий далил сифатида олинган.
Шу каби департаментнинг Янгиҳаёт туман бўлими томонидан ўтказилган тезкор тадбирда “Л.” МЧЖ савдо дўконидан 64 турдаги жами 339 дона алкоголь маҳсулоти ва 83 литр спиртга ўхшаш суюқлик ашёвий далил сифатида олинган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)