Нигерия шимолида 23 июнь куни қуролли гуруҳлар 100 дан ортиқ фуқарони ўғирлаб кетган. Бу ҳақда Al Jazeera нашри хабар берди.
Манбада айтилишича, ҳодиса шимолий Кацина штатида рўй берган. Мототциклларда келган бир гуруҳ шахслар тинч аҳолига қарата ўт очган.
Майдабино қишлоғида ҳужум оқибатида 7 киши ҳалок бўлган. 100 нафардан ортиқ фуқаролар ҳудуддан олиб кетилган.
Штат полицияси матбуот котиби Абубакар Алию Содиқ ҳужум ва етти кишининг ўлимини тасдиқлаган. Бедарак йўқолганлар ҳақида эса маълумот тақдим қилинмаган. Расмийлар ҳодиса юзасидан тергов олиб борилаётганини билдирган.
“Улар етти кишини ўлдиришган, жумладан, иккита вояга етмаган бола ёқиб юборилган. Қуролли ҳужум 6 соатдан ортиқ давом этган”, — полиция матбуот котиби Абубакар Алию Содиқ
Сўнгги йилларда тинч аҳоли вакилларини ўғирлаб кетиш Нигериянинг шимоли-ғарбий ва марказий минтақаларида кўплаб кузатилган. Ушбу ҳудудларда ўнлаб қуролли гуруҳлар катта тўловлар талаб қилиш учун қишлоқ аҳолиси ва саёҳатчиларни ўғирлаган.
Маҳаллий аҳоли ва расмийларга кўра, март ойида қуролли шахслар шимоли-ғарбий Кадуна штатидаги мактабга ҳужум уюштириб, ўнлаб ўқувчиларни ўғирлаб кетган. Ўтган йили ҳам қуролли шахслар шимоли-ғарбий Кебби штатидаги мактабга бостириб кириб, 80 дан ортиқ ўқувчини олиб кетган эди.
Изоҳ (0)