Жаҳон Савдо Ташкилоти (ЖСТ)нинг еттинчи бош директори Нгози Оконжо-Ивеала 5 июнь куни Ўзбекистонга ташриф буюрди. У ташриф чоғида мамлакат президенти Шавкат Мирзиёев, президент ёрдамчиси Саида Мирзиёева ҳамда бошқа мутасаддилар билан қатор учрашувлар ўтказди.
ЖСТга қўшилишнинг афзалликлари
ЖСТга аъзо бўлишнинг кўплаб афзалликлари бор. Мамлакат қилиши керак бўлган нарса – бор имкониятлардан фойдаланиш. Ташкилот аъзолари дунё савдосининг 98 фоизини қамраб олади ва сиз унга аъзо бўлиш орқали бошқалар билан ишлаш имкониятига эга бўласиз. ЖСТга аъзолик Ўзбекистон ишлаб чиқарувчиларига жаҳон бозорига чиқиб, рақобатбардошликни ошириш имкониятларини беради. Ташкилотга аъзо бўлган мамлакатлар юқорироқ иқтисодий ўсиш суръатларини кўрсатмоқда.
Сўнгги ўн йилликларда ЖСТга қўшилган мамлакатларда иқтисодий ўсиш кузатилмоқда. 2024 йил май ойида Женевада ЖСТ аъзоларини қизиқтирган асосий масалалар бўйича муваффақиятли музокаралар ўтказилди, — дейди директор Нгози Оконжо-Ивеала.
Ижобий ўсиш ва қийинчиликлар
Оконжо-Ивеала Ўзбекистон ривожланишига берган ижобий баҳоси билан бирга, олдинда турган қийинчиликларга ҳам тўхталиб ўтди.
Президент Мирзиёев 2026 йилга келиб ЖСТга аъзо бўлишни мақсад қилган ва биз Ўзбекистонга бу йўлда ёрдам берамиз. Ҳали олдимизда кўп ишлар бор ва кейинги йилларда президентнинг мақсадига эришиш учун жуда кўп меҳнат қилишимиз лозим. Мамлакатга ЖСТга аъзо бўлишлик йўлида тиришқоқлик билан ишлаш ҳамда кўпроқ ислоҳотлар талаб этилади. ЖСТга аъзоликни 22 та давлат кутмоқда. Агар бу ташкилот муваффақиятли бўлмаганида, унинг аъзолари сони 166 га етар эдими? Нега 22 та давлат ЖСТга аъзо бўлиш учун шунча ҳаракат қилмоқда? Шубҳасиз, бу фойда йўқотишлардан кўплигини кўрсатади, — қайд этди у.
Ўзбекистон иқтисодиёти учун тавсиялар
ЖСТ бош директори ўзбек тадбиркорлари рақобатдан қўрқмаслиги кераклигини қайд этди. У, шунингдек, Ўзбекистон иқтисодиётини яхшилаш учун тавсиялари билан бўлишди.
Ўзбек корхоналари рақобатдан қўрқмаслиги керак. Чунки рақобат корхоналарни самаралироқ қилади. ЖСТга аъзолик Ўзбекистон корхоналарига янги бозорлар ва имкониятлар очади. Таркибий инфратузилмани яхшилаш ва Ўрта коридор билан боғланиш учун қилинган инвестициялар Ўзбекистонни дунё билан боғланган мамлакатлар қаторига қўшади. Бу логистикада рақобатбардошроқ бўлишга ёрдам беради. Ишонаманки, биз бунга эришамиз.
Ҳозиргидек макроиқтисодий рамкани жуда яхши бошқариш муҳим. Шунингдек, янги тармоқларни, янги иш ўринларини яратиш ва қиймат занжирини ривожлантириш учун афзалликлардан фойдаланиш зарур. Шу тариқа биз ёшларимиз учун бўш иш ўринларини яратишимиз мумкин, — деди у.
Таъкидлаш жоиз, Шавкат Мирзиёев 5 июнь куни Жаҳон савдо ташкилоти (ЖСТ) бош директори доктор Нгози Оконжо-Ивеалани қабул қилди. Учрашувда Ўзбекистоннинг ЖСТга қўшилиши борасида кўрилаётган амалий чора-тадбирлар муҳокама қилинган. Шунингдек, “яшил” иқтисодиётни ривожлантириш, электрон савдо ва рақамли хизматлар экспортини ошириш соҳасида ҳамкорликни йўлга қўйиш муҳимлиги таъкидланган. Учрашув якунида Нгози Оконжо-Ивеала Ўзбекистоннинг ташкилотга аъзо бўлиш йўлидаги саъй-ҳаракатларини қўллаб-қувватлашини билдирди.
Изоҳ (0)