Турли гуруҳлардан иборат қуролли тўдалар сўнгги икки ой ичида Ғазо секторидаги банклардан 120 миллион долларга яқин нақд пул ўғирлаган. Бу ҳақда Financial Times нашри хабар бермоқда.
Нашрнинг маълум қилишича, БМТ ҳисоб-китобларига кўра, қисман ҲАМАС томонидан қўллаб-қувватланган тўдалар Ғазо шимолида жойлашган банк кассаларидан нақд пулнинг камида учдан бир қисмини ўғирлаган. Қайд этилишича, банклар ўғриликнинг олдини олиш учун алоҳида сейфларни бетон конструкциялар билан ўраб чиқиб, қарийб 240 миллион долларни сақлаб қолишга муваффақ бўлган.
Энг йирик банк ўғирликлари 17 ва 18 апрель кунлари содир бўлган. Бундан сал олдин Фаластин банки филиалларидан бирининг пулларни сақлаш хонасига бетон қуйиб чиққанди. Бироқ воқеа гувоҳининг сўзларига кўра, жиноий гуруҳ уни 17 апрель куни портлатиб, ўша куни 31 миллион долларни ўғирлаган. 18 апрель куни қуролли гуруҳлар тахминан 36 миллион долларлик иккинчи йирик ўғриликни амалга ошириб, пуллар “Ғазодаги олий ҳокимият буйруғи билан мусодара қилинган” деб даъво қилишган.
Ўғриликлар фонида Исроил расмийлари ўғирланган маблағларнинг бир қисмидан ҲАМАС жангчилари яширин кураш олиб бориш учун фойдаланиши мумкинлигидан хавотир билдирди, деб таъкидлайди Financial Times.
Газетанинг эслатишича, Исроил аввалроқ Ғазо секторига нақд пул олиб киришга чекловлар қўйган, бу эса танқисликка олиб келганди. Айтилишича, маҳаллий аҳоли Ғазо секторининг марказий қисмида банкоматдан фойдаланиш учун пул тўлаши керак, бу ерда фақат бир нечта ишлайдиган банкоматлар қолган.
Изоҳ (0)