Саудия Арабистонининг “Подшоҳ Салмон” номидаги инсонпарварлик ёрдами маркази Ўзбекистонга беғараз кўмак сифатида 25 тонна хурмо мевасини ҳадя қилди. Бу ҳақда “Вақф” хайрия жамоат фонди хабар берди.
Хурмоларни Саудия Арабистонининг Ўзбекистондаги элчиси Юсуф Солиҳ Алгаҳра Ўзбекистон мусулмонлари идораси раисининг ўринбосари Зайниддин домла Эшонқулов, Диний идора раисининг Иқтисод ишлари бўйича маслаҳатчиси Алишер Эшимов ва “Вақф” хайрия жамоат фонди раҳбари Исохон Абдуллаевга топширган.
Эндиликда ҳадя қилинган хурмо мевалари “Вақф” хайрия жамоат фондининг Қорақалпоғистон Республикаси, вилоятлар ва Тошкент шаҳридаги филиаллари томонидан ижтимоий кўмакка муҳтож, боқувчисини йўқотган, етим, ногиронлиги бор кишилар ҳамда “Мурувват” уйлари ва шифохоналардаги ҳақдор юртдошларга хайрия қилинади.
Топшириш маросимида “Подшоҳ Салмон” номидаги инсонпарварлик ёрдами маркази вакиллари Аднан Хатим Асирий ва Алақил Абдулҳаким Саъад ҳам иштирок этган.
- Эслатиб ўтамиз, 2021 йилда Саудия Арабистони Ўзбекистондаги “Вақф” фондига 20 минг нусхада Қуръони карим ҳадя қилганди.
- Ўша йилнинг март ойи охирларида Саудия Арабистони Рамазон ойи муносабати билан Ўзбекистонга 50 тонна хурмо совға қилган эди.
Изоҳ (0)