Қирғизистон президенти Садир Жапаров давлат ташрифи билан Ўзбекистонга келиши режалаштирилмоқда. Бу ҳақда Қирғизистон Вазирлар Маҳкамаси раиси Ақилбек Жапаров маълум қилди.
“Икки президентнинг бўлажак учрашуви яхши қўшничилик ва ўзаро манфаатли муносабатларни ривожлантириш йўлидаги муштарак иродани ўзида мужассамлаштирган ҳолда мамлакатларимиз ўртасидаги дўстона алоқаларни мустаҳкамлашда муҳим лаҳза бўлади”, — деган у 13 июнь куни Бишкекда бўлиб ўтган Қирғизистон—Ўзбекистон бизнес-форумида.
Унинг таъкидлашича, давлат раҳбарлари икки мамлакат ўртасидаги товар айирбошлаш ҳажмини 2 миллиард долларга етказиш вазифасини қўйган. Бу мақсадга эришиш учун биргаликда ҳаракат қилиш, барча мавжуд восита ва механизмларни ишга солиш лозим.
Қирғизистон президенти Садир Жапаров Ўзбекистонга сўнгги марта 2023 йилнинг ноябрида, Иқтисодий ҳамкорлик ташкилотининг 16-саммитида иштирок этиш учун келганди. Давлат ташрифи билан эса 2021 йилнинг март ойида келганди.
Изоҳ (0)