Ўзбекистон ва Германия ўртасида меҳнат миграцияси соҳасида ҳамкорлик кенгайтирилади, деб хабар бермоқда “Дунё” АА.
Маълум қилинишича, камбағалликни қисқартириш ва бандлик вазири Беҳзод Мусаев бошчилигидаги делегация амалий ташриф билан Германияга борди ва ташриф давомида Германия иқтисодиёти Шарқий қўмитаси билан ҳамкорликда йирик немис иш берувчи компания вакиллари иштирокида давра суҳбати ташкил этилди.
Суҳбатда вақтинча хорижда ишлаш истагида бўлган ўзбекистонликларни Европанинг ривожланган давлатига ишга жалб этиш борасидаги ҳамкорликни янада кенгайтириш, ушбу давлатга меҳнат миграциясини тез ва самарали ташкил этиш масалалари муҳокама қилинди.
Немис ишбилармонлари айни пайтда Германияда ташқи ишчи кучига бўлган эҳтиёж ортиб бораётганини, айниқса, ҳамширалик ва фелдшерлик, юк машинаси ҳайдовчиси, саноат, мехатроника, гастрономия, йўл қурилиши соҳаларида 130 мингдан ортиқ ишчи кучига эҳтиёж мавжудлигини билдирдил.
Учрашувда Ўзбекистон билан кўп йиллардан буён меҳнат миграцияси соҳасида ҳамкорлик қилиб келаётган компаниялар вакиллари ўз тажрибалари билан бўлишди ва бошқаларни ҳам Ўзбекистон билан ҳамкорликка чорлади.
Шунингдек, мулоқотда Германия меҳнат бозори талабларидан келиб чиққан ҳолда фуқароларнинг касбий тайёргарлигини ошириш, немис тилини ўрганиш учун шарт-шароитлар яратиш, виза олишда енгилликлар жорий этиш бўйича ўз таклифларини билдирди. Касб-ҳунарга ўқитишнинг немис моделини жорий этишга қаратилган қўшма лойиҳаларни амалга ошириш ташаббуси илгари сурилди.
Немис компаниялари вакиллари Ўзбекистон билан ҳамкорликни кенгайтиришга тайёрлигини билдирди.
Аввалроқ Германияга ишга кетувчи ўзбекистонликлар учун тил талаблари енгиллаштирилиши мумкинлиги хабар қилинганди.
Изоҳ (0)