Камбағалликни қисқартириш ва бандлик вазири Беҳзод Мусаев Германиянинг Mangold Consulting Gmbh компанияси президенти Клаус Мангольд ҳамда бошқарувчи директор, доктор Кристоф Мангольд билан учрашди. Бу ҳақда вазирлик матбуот хизмати хабар берди.
Қайд этилишича, учрашувда хорижда ишловчилар учун шароитлар, касб-ҳунарга ўқитиш ва ўзбекистонликларни Германияда талаб юқори бўлган ишларга жалб қилиш масалалари муҳокама қилинган.
Айни пайтда Германиядаги катта демографик жараёнлар боис бошқа давлатлардан меҳнат кучига талаб ортиб бормоқда. Бугунги кунда Ўзбекистондан тиббиёт йўналишидаги мутахассислар Германияда иш фаолиятини олиб бормоқда.
Мазкур йўналишда ҳали ҳамон иш кучига талаб катталиги билдириб ўтилди. Жумладан, Германиядаги 1000 дан ортиқ шифохоналарга тиббиёт ходимлари етишмаётгани ва бу борада Ўзбекистон томони ушбу бўшлиқни тўлдиришга тайёрлиги таъкидланди. Бироқ ушбу жараённи тил билишдаги муаммолар секинлаштириб юбораётгани ва бу борада тил бўйича қўйилган талабларни юмшатиш таклиф этилди. Жумладан, немис тили ўқув курслари муддатини қисқартириш зарурлиги билдирилди, — дейилади хабарда.
Шунингдек, учрашувда нафақат тиббиёт йўналишидаги балки металлни қайта ишлаш корхоналаридаги мехатроника, логистика, юк автомобили ҳайдовчилиги йўналишларига катта талаб борлиги айтиб ўтилган. Ўз навбатида барча келишувларни тезроқ ҳаётга татбиқ этиш учун ҳуқуқий асосларни ишлаб чиқишга келишиб олинган.
Март ойининг бошларида ўзбекистонликлар 1,7 минг доллар маош билан Германияга ишга таклиф қилинаётгани тўғрисида хабар берилганди. Бунда улардан Gyote, ECL, ÖsD ёки TELC’дан олинган немис тили бўйича камида А2 сертификати талаб қилинади.
Изоҳ (0)