O‘zbekiston va Germaniya o‘rtasida mehnat migratsiyasi sohasida hamkorlik kengaytiriladi, deb xabar bermoqda “Dunyo” AA.
Ma’lum qilinishicha, kambag‘allikni qisqartirish va bandlik vaziri Behzod Musayev boshchiligidagi delegatsiya amaliy tashrif bilan Germaniyaga bordi va tashrif davomida Germaniya iqtisodiyoti Sharqiy qo‘mitasi bilan hamkorlikda yirik nemis ish beruvchi kompaniya vakillari ishtirokida davra suhbati tashkil etildi.
Suhbatda vaqtincha xorijda ishlash istagida bo‘lgan o‘zbekistonliklarni Yevropaning rivojlangan davlatiga ishga jalb etish borasidagi hamkorlikni yanada kengaytirish, ushbu davlatga mehnat migratsiyasini tez va samarali tashkil etish masalalari muhokama qilindi.
Nemis ishbilarmonlari ayni paytda Germaniyada tashqi ishchi kuchiga bo‘lgan ehtiyoj ortib borayotganini, ayniqsa, hamshiralik va feldsherlik, yuk mashinasi haydovchisi, sanoat, mexatronika, gastronomiya, yo‘l qurilishi sohalarida 130 mingdan ortiq ishchi kuchiga ehtiyoj mavjudligini bildirdil.
Uchrashuvda O‘zbekiston bilan ko‘p yillardan buyon mehnat migratsiyasi sohasida hamkorlik qilib kelayotgan kompaniyalar vakillari o‘z tajribalari bilan bo‘lishdi va boshqalarni ham O‘zbekiston bilan hamkorlikka chorladi.
Shuningdek, muloqotda Germaniya mehnat bozori talablaridan kelib chiqqan holda fuqarolarning kasbiy tayyorgarligini oshirish, nemis tilini o‘rganish uchun shart-sharoitlar yaratish, viza olishda yengilliklar joriy etish bo‘yicha o‘z takliflarini bildirdi. Kasb-hunarga o‘qitishning nemis modelini joriy etishga qaratilgan qo‘shma loyihalarni amalga oshirish tashabbusi ilgari surildi.
Nemis kompaniyalari vakillari O‘zbekiston bilan hamkorlikni kengaytirishga tayyorligini bildirdi.
Avvalroq Germaniyaga ishga ketuvchi o‘zbekistonliklar uchun til talablari yengillashtirilishi mumkinligi xabar qilingandi.
Izoh (0)