Ўзбекистон ва Эрон балиқчилик тармоғини ривожлантириш бўйича ҳамкорлик қилади, деб хабар бермоқда “Дунё” ахборот агентлиги.
Унга кўра, Қишлоқ хўжалиги вазирлиги, Инвестициялар, саноат ва савдо вазирлиги, Ветеринария ва чорвачиликни ривожлантириш қўмитаси, “Ўзбалиқсаноат” уюшмаси ва ишбилармон доира вакилларидан иборат мамлакат делегацияси амалий ташриф билан Эронга борди.
Ташриф давомида Ўзбекистон делегацияси аъзолари Эрон қишлоқ хўжалиги вазири ўринбосари — Балиқчилик ташкилоти раиси Саид Хоссейний билан учрашув ўтказди. Мулоқот чоғида Ўзбекистон ва Эрон ўртасида балиқчилик, аквакултура, чорвачилик, ветеринария ва қишлоқ хўжалиги бўйича ҳамкорлик алоқаларини ривожлантириш ҳамда Ўзбекистонда қўшма лойиҳаларни амалга ошириш истиқболлари муҳокама қилинди.
Эрон қишлоқ хўжалиги вазири ўринбосари мамлакатнинг балиқчилик ва аквакултура бўйича салоҳияти тўғрисида маълумот берди. Қайд этилишича, 2023 йилда Эронда 1,4 миллион тонна балиқ маҳсулотлари ишлаб чиқарилган ва қиймати 650 миллион АҚШ долларига тенг 210 минг тонна балиқ ва денгиз маҳсулотлари экспорт қилинган.
“Ўзбалиқсаноат” уюшмаси вакиллари Ўзбекистоннинг балиқчилик салоҳияти ва имкониятлари ҳамда ушбу йўналишда ҳаётга тадбиқ этилаётган дастурлар юзасидан тақдимот ўтказди. Учрашув якунида томонлар ушбу соҳада ўзаро манфаатли ҳамкорликни йўлга қўйиш тўғрисида келишиб олди.
Изоҳ (0)