Наманган вилояти Поп туманида хавфсизлик чоралари кўрилмаган иккита метан заправка газ таъминотидан ажратилди. Бу ҳақда “Ўзэнергоинспекция” матбуот хизмати хабар берди.
Қайд этилишича, “Ўзэнергоинспекция” Наманган вилояти ҳудудий бошқармаси томонидан Поп туманида жойлашган “И.П.П.Т.” МЧЖ ва “П.М” МЧЖларга қарашли иккита автомобилларга газ тўлдириш компрессор шохобчаларида ўрнатилган технологик жараёнларининг амалдаги меъёр ва қоидаларга мувофиқлиги, табиий газни қабул қилиб олиш, сақлаш, тарқатилиши ҳолатлари юзасидан ўрганиш ўтказилган.
Ўрганиш жараёнида АГТКШлар фаолиятида аҳоли ҳаёти ва соғлиғига хавф туғилиши билан боғлиқ бўлган қўпол қоидабузарликлар аниқланган.
Ушбу ҳолатлардаги қоидабузарликка сабаб бўлувчи омиллар тўлиқ бартараф этилгунга қадар мазкур АГТКШлар табиий газ таъминотидан ажратилган.
Бундан олдин Фарғонада хавфсизлик чоралари кўрилмаган метан заправка газ таъминотидан ажратилгани, Андижонда хавфсизлик чоралари кўрилмаган метан заправка газ таъминотидан узилгани тўғрисида хабар берилганди.
Изоҳ (0)