Афғонистоннинг Бомиён вилоятида 17 май куни юз берган отишмада 3 нафар Испания фуқароси ҳалок бўлган. Бу ҳақда Испания бош вазири берган баёнотга асосланиб, CNN нашри хабар берди.
Манбада айтилишича, отишмада жами 4 нафар шахс ҳалок бўлган. Уларнинг уч нафари испан сайёҳи ва 1 нафари маҳаллий фуқаро бўлган.
Афғонистон Ички ишлар вазирлиги ҳам ушбу хабарни тасдиқлаган. Вазирлик матбуот котиби Абдул Матин Қане Бомиёндаги фалокат қурбонларининг оилаларига ҳамдардлик йўллаган.
Бир қанча маҳаллий нашрлар яраланган фуқаролар ҳақида ҳам хабар берган. Тўрт нафар хориж фуқароси ва уч нафар афғонистонлик ҳужумда яраланиб, яқин атрофдаги касалхонага олиб кетилгани айтилган.
Испания Ташқи ишлар вазирлиги фавқулодда консуллик бўлими билан вазиятни аниқлаштириш, жабрланганларга ёрдам бериш ва уларнинг оилалари билан боғланиш учун қизғин иш олиб бораётганини билдирган.
“Афғонистонда испаниялик сайёҳларнинг ўлдирилиши ҳақидаги хабардан ҳайратда қолдим. Мен вазиятни диққат билан кузатиб боряпман. Испания Ташқи ишлар вазирлигининг Фавқулодда консуллик бўлими барча зарур ёрдамни кўрсатиш борасида ишламоқда. Қурбон бўлганларнинг оила аъзолари ва дўстларига ҳамдардлигимни билдираман”, — деб ёзган Испания бош вазири Педро Санчес.
Изоҳ (0)