Фарғона вилоятининг Марғилон шаҳрида бўлиб ўтиши режалаштирилган гала-концерт чипталари ўқитувчиларга мажбурий тарзда сотилаётгани ҳақида хабар берилди. Бу ҳақда “Дарё”га шикоят қилган фуқаронинг ёзишича, “масъуллар ўқитувчилар чўнтагига кўз тикишни бас қилмаяпти”.
Нимага Мустақиллик байрамига, Наврўз ҳамда 1 октябрь — Устоз ва мураббийлар кунига аталган байрамларга ёки бирор халқ артистининг концертига эмас?” — дейди ёш хонандалар концертига билет сотилаётганидан шикоят қилган мурожаатчи.
Концерт ташкилотчиси бўлган тадбиркор Дилмурод Матмусаев чипталарнинг мажбуран сотилаётганини рад этди.
“Билет мажбурлаб сотиляпти, дейишгани ёлғон. Биз керак бўлса, айрим мактабларга текин билет тарқатдик ҳам. Қолганларига эса, шунчаки тавсия қиляпмиз, ким истаса олсин, истамаса йўқ”, — дейди концерт ташкилотчиси.
Гилам ювиш хизмати билан шуғулланувчи ташкилот ҳомийлигида ташкиллаштирилаётган концертда таклифнома олган ҳар бир меҳмонга айнан шу ташкилот хизматидан фойдаланиш учун 50 минг сўмлик ваучер ҳам берилмоқда.
“Ҳар бир меҳмонга чиптага қўшиб, 50 минг сўмлик ваучер ҳам бериляпти. Аслида, ўша ваучер ҳисобига чипта пули бепулга тушади. Шунга қарамасдан, биз шунчаки таклиф беряпмиз. Ҳеч кимни мажбурламадик”, — дейди Дилмурод Матмусаев.
“Дарё”нинг бу ҳақдаги саволига жавоб берган вилоят Мактабгача ва мактаб таълими бошқармаси ахборот хизмати раҳбари Одилжон Жалолов мазкур маълумотни текшириш мақсадида тумандаги 12 та мактаб ва 4 та боғчага кириб чиққанини, бироқ бундай ҳолат тасдиқланмаганини маълум қилди.
“Ҳолатни ўрганяпмиз. Бирор маълумот аниқланса, бу ҳақда жамоатчиликка маълум қиламиз. Ҳозирча бу ахборотни тасдиқлай олмаймиз. Боиси таълим муассасаларида бўлиб, вазиятни ўрганганимизда ҳолат тасдиғини топмаяпти”, — дейди масъул.
Изоҳ (0)