Давлат улуши бор корхоналарнинг акция пакетлари жисмоний шахсларга сотилади. Бу ҳақда Давлат активларини бошқариш агентлиги директори Акмалхон Ортиқов “Дарё” мухбирига берган қисқача интервьюсида айтиб ўтди.
Унга кўра, жорий йилда 250 га яқин давлат улуши бўлган акция пакетлари, давлат корхоналари ва мингдан ортиқ кўчмас мулк объектлари сотувга чиқарилади.
Бу йил хусусийлаштириш бўйича катта дастур тасдиқланган. Чунки хусусийлаштириш давомий жараён бўлгани учун ҳар йили активларни хатловдан ўтказиб, маҳаллий бозорга тақдим қиладиган ва халқаро бозорларга олиб чиқадиган активларимизни рўйхатини тасдиқлаб оламиз.
Сотувга қўйилган 250 га яқин корхона ичида ҳозир бозорда худди шундай кўплаб бошқа ишлаб чиқарувчилар ва рақобат муҳити таъминланган корхоналар бор. Мисол учун “Ўзавтосаноат” АЖ таркибидаги эҳтиёт қисмлари ишлаб чиқарувчи 40 га яқин корхона шулар жумласидан. Бугун бундай эҳтиёт қисмларини ишлаб чиқарувчилар бозорда бор. У давлат корхонаси эмас, хусусий тадбиркор корхонаси бўлиши керак. Буларнинг акция пакетлари ёки жамиятдаги улуши савдога чиқарилади, — деди Акмалдан Ортиқов.
Унинг қўшимча қилишича 12 та корхонанинг маҳаллий фонд бозорида IPO ва SPO шаклда акциялари сотилади.
Буларга Тошкент фонд биржаси акциялари ва кўпчиликка таниш бўлган “E-auksion” электрон тизими киритилган. Мазкур корхоналар давлат улуши 100 фоиз бўлган аксионерлик жамиятларидир. Бу билан халққа акцияларни сотиб олиш имкони бермоқчимиз, — дейди Давактив директори
Апрель ўрталарида Шавкат Мирзиёевга 2024 йилги хусусийлаштириш дастури ва унинг ижросини самарали ташкил этишга қаратилган чора-тадбирлар ҳақида ахборот берилганди. Ўшанда давлат активлари 3 ойда сотилмаса, (Тошкент шаҳри ва вилоят марказлари бундан мустасно) уларнинг бошланғич баҳоси 10 фоизгача босқичма-босқич пасайтирилиши маълум қилинган эди.
Изоҳ (0)