Ҳусайн Норчаевнинг Қатарда машҳур бўлган дўпписи 50 миллион сўмга сотилди

Қатарда ўтказилган U-23 Осиё кубогида Ўзбекистон Олимпия терма жамоаси аъзоси Ҳусайн Норчаев машҳур қилган дўппи аукционда 50 миллион сўмга сотилди. 

“Championat.аsia” нашри бош муҳаррири томонидан ташкил этилган аукционда дўппининг бошланғич нархи 1 миллион сўм деб белгиланган эди. 4 кун давом этган аукцион савдоларидан сўнг Тимур Кападзе бошчилигидаги Ўзбекистон U-23 терма жамоаси мураббийлар штаби ва футболчилари энг юқори нархни таклиф этиб, дўппини сотиб олди. Шундай қилиб, 50 миллионга сотилган дўппи Ўзбекистон футбол ассоциацияси музейига топширилди. 

Нарзулла Сайдуллаевнинг таъкидлашича, аукциондан тушган барча пул маблағлари болалар шифохонасига хайрия сифатида ўтказилади. 

Эслатиб ўтамиз, ушбу дўппини Норчаев биринчи бор Саудия Арабистони билан ўйинда голни нишонлаш мобайнида кийган эди.

Бундан ташқари Индонезия билан ўйинда ҳам гол киритган Ҳусайн яна бир бор ўзбек миллий бош кийимида кўриниш берган эди.

“Нефтчи”да ижара асосида ўйнаётган футболчи мусобақада уч бора рақиблар дарвозасига йўл топди. Норчаев гуруҳ баҳсларида Кувайтга урилган 5 голнинг сўнггисига муаллифлик қилди. Бундан ташқари у Саудия Арабистони ҳамда Индонезия дарвозасига голлар уриб, Ўзбекистон Олимпия жамоасининг муваффақиятли юришида ўз ҳиссасини қўшди. 

Ушбу мусобақада Ўзбекистон U-23 жамоаси тарихда биринчи бор Олимпия йўлланмасини қўлга киритди. Жамоа бош соврин учун курашда Япония жамоасига ўтказиб юборилган ягона гол сабаб мағлуб бўлиб, кумуш медалларига эга чиқди.