Тошкент шаҳрида акциз маркасиз тамаки маҳсулотларини муомалага киритилишининг олди олинди, деб хабар беради Бош прокуратура ҳузуридаги департамент.
Қайд этилишича, департаментнинг Учтепа туман бўлими томонидан Тошкент шаҳар божхона бошқармаси ходимлари билан ҳамкорликда тезкор тадбир ўтказилган. Тадбирда тамаки маҳсулотлари савдоси билан шуғалланиб келган А.Й. ўз уйида умумий баҳоси 116,5 миллион сўм бўлган олти турдаги хорижда ишлаб чиқарилган жами 8 770 қути акциз маркасиз тамаки маҳсулотини ўтказиш мақсадида сақлаб келаётгани аниқланиб, ушбу тамаки маҳсулотлари ашёвий далил сифатида олинган.
Мазкур ҳолат юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, тергов ҳаракатлари ўтказилмоқда.
Бир неча кун олдин Чуст туманида 5 минг қути “Mилано” номли акциз маркасиз тамаки маҳсулотлари савдоси тўхтатиб қолинган эди. Ундан олдин ҳам Наманганда 2 минг қути акциз маркасиз тамаки маҳсулотлари муомалага киритилишининг олди олинганди.
Изоҳ (0)