Чехия Россиядаги элчисини расман чақириб олди

Чехия Россиядан ўзининг элчиси Витезлав Пивонкани расман чақириб олди. Бу ҳақда Чехия ташқи ишлар вазири Ян Липавскийга таяниб, “РБК” хабар берди.

Липавскийнинг айтишича, Чехия ҳозирда янги элчи топиш устида ишламоқда.

“Ҳозирги элчи аллақачон чақириб олинган, менимча, бир кун келиб Чехиянинг янги элчиси фаолият юритади”, — деди вазир. 

У Пивонкага Москвадаги фаолияти учун шахсан миннатдорлик билдирганини таъкидлади. ТИВ раҳбари Чехиянинг вақтинчалик вакили номини айтмади ва дипломатик миссия элчисиз ишлаш муддатини ҳам кўрсатмади.

Элчиликка номзодлар орасида дипломат ва мудофаа вазирининг собиқ ўринбосари Даниэль Коштовал ҳам бор. Липавский Чехия вакиллари 7 май куни бўлиб ўтадиган президент Владимир Путиннинг инаугурация маросимида қатнашмаслигини айтган.

• 54 ёшли Пивонка 2018 йилда Россияга элчи бўлган. 2014—2018 йилларда Озарбайжондаги элчи, 2006—2011 йилларда Украинадаги элчи ўринбосари (2010—2011 йилларда бир йилдан ортиқ вақт давомида вақтинчалик ишончли вакил лавозимида ишлаган) сифатида фаолият юритган.
• У 2002 йилдан буён Чехия Ташқи ишлар вазирлигида ишлаб келмоқда. 2022 йил 24 февралда Чехия маслаҳатлашувлар учун Россиядан элчисини чақириб олганди. Ўшандан бери Пивонка Прагада яшади. Бундан ташқари, у “стандарт тўрт йилдан кўпроқ” лавозимда ишлаган.