“Киев Россия бўйича ўз позициясини тинчлик саммитидан сўнг эълон қилади” — Украина расмийси

Июнь ойида Швейцарияда бўлиб ўтадиган глобал тинчлик саммити Россия билан музокараларда фойдаланиш учун умумий позицияни ишлаб чиқади. Бу ҳақда Украина президенти матбуот котиби Сергей Никифоров DW’га берган интервьюсида хабар берди.

Украина ва Швейцария тинчлик саммитини ташкил қилмоқда, унда халқаро ҳуқуқ ва БМТ низомини ҳурмат қиладиган давлатлар музокаралар бўйича умумий позицияни ишлаб чиқишлари ва уни Россияга топширишлари керак, — деди Никифоров.

Аввалроқ Украина Мудофаа вазирлиги вакили Вадим Скибицкий The Economist нашрига берган интервьюсида “Украина Россияни фақат жанг майдонида мағлуб эта олмаслигини” айтган. Унинг сўзларига кўра, Украина армияси Россия ҳарбийларини 1991 йилги чегараларгача сиқиб чиқарса ҳам, бу билан уруш тугамайди. У бундай урушлар фақат келишувлар билан якунланиши мумкинлигини қўшимча қилган.

Украина бўйича глобал тинчлик саммити 15–16 июнь кунлари Швейцариянинг Бюргеншток курортида бўлиб ўтади. Анжуманда 100 га яқин давлат иштирок этиши кутилмоқда.

Мазкур саммитга Россия таклиф қилинмаган. Москва, ўз навбатида, бундай учрашув Россия иштирокисиз мантиқсиз бўлишини таъкидлаган.