Ҳалқум, бўғиз ёки трахея шиллиқ қаватида яллиғланиш ва шиш — томоқда оғриқ пайдо бўлишининг асосий сабабчиси. Шиллиқ қават ва бодомсимон без ҳажми катталашгани сабабли ютинишда муаммолар ва оғриқлар пайдо бўлади. Ўз вақтида даволанмаган томоқ оғриғи кейинчалик сурункали хасталикка айланиб кетади. Қуйида томоқ оғриғи кучайиб кетишининг асл сабаблари, уни даволашда йўл қўйиладиган ва кенг тарқалган 6 та хатони кўриб чиқамиз.
- Совуқ ҳаво туфайли томоқ оғриб қолади
Совуқ шамол ва томоқ оғриғи ўртасида бевосита боғлиқлик мавжуд эмас. Аммо совуқ ҳаво организм кўпроқ иссиқлик ишлаб чиқаришига туртки беради ва қон айланиш тезлигини камайтиради. Бу эса иммун тизимини бир оз заифлаштиради ва организмнинг инфекциялар билан курашиш қобилиятини сусайтиради.
- Томоқ оғриганда музқаймоқ ва совуқ нарсалар ейиш мумкин эмас
Музқаймоқ кучли томоқ оғриғини енгиллаштиради. Чунки қон томирларининг совиши ва торайиши туфайли томоқнинг яллиғланган қисми қон билан таъминланиши камаяди, натижада шиш ва оғриқлар камаяди. Бироқ музқаймоқ вирус ва бошқа патоген микроорганизмларни бартараф этмайди ва томоқни даволамайди.
- Томоқ оғриганда антибиотиклар қабул қилиш шарт
Томоқ оғриғини фақат бактериялар келтириб чиқармайди, бунга юзлаб сабаблар мавжуд. Агар оғриқ вирус ёки аллергия сабабли юзага келса, антибиотиклар таъсир қилмайди. Шифокор назоратисиз ҳамда ҳеч қандай сабабсиз антибиотикларни қабул қилиш мумкин эмас. Улар фақат касаллик бактериал характерга эгалиги аниқлангандан сўнг мутахассис томонидан ёзиб берилиши зарур. Масалан, ўткир фарингит антибиотиклар билан даволанади.
- Томоқ оғриғини даволамаса ҳам ўзи ўтиб кетади
Вирусли инфекция сабаб юзага келган енгил томоқ оғриғи битта препарат ёрдамида 5-6 кун ичида ўтиб кетиши мумкин. Аммо касаллик даволанмасдан ўз ҳолича ташлаб қўйилса, томоқ оғриғи узоқ вақтга чўзилиб кетади. Агар касаллик аломатлари бир ҳафта ичида енгиллашмаса, баланд ҳарорат ва бошқа нохуш ҳолатлар билан бирга кечса, мутахассисга мурожаат этиш лозим.
- Жисмоний фаолликдан сўнг томоқ оғриғи кучайиб кетади
Бу ҳам янглиш фикр. Енгил жисмоний фаолликни талаб этадиган тез юриш, сузиш, ёга, велосипедда учиш кабилар иммунитетни мустаҳкамлайди ва касалликни енгишга ёрдам беради. Кучли ва юқори интенсивликни талаб этадиган спорт машғулотларини эса четга суриб турган мақул.
- Алкоголь томоқ оғриғини даволайди
Ҳатто жуда оз миқдордаги спиртли ичимликлар ҳам организмни сувсизлантириб юборади, бу эса томоқ оғриғини янада кучайтириши мумкин. Бундан ташқари, спиртли ичимликларни узоқ муддат истеъмол қилиш иммунитетни пасайтиради ва юқумли касалликларга чалиниш хавфини оширади.
Изоҳ (0)