Halqum, bo‘g‘iz yoki traxeya shilliq qavatida yallig‘lanish va shish — tomoqda og‘riq paydo bo‘lishining asosiy sababchisi. Shilliq qavat va bodomsimon bez hajmi kattalashgani sababli yutinishda muammolar va og‘riqlar paydo bo‘ladi. O‘z vaqtida davolanmagan tomoq og‘rig‘i keyinchalik surunkali xastalikka aylanib ketadi. Quyida tomoq og‘rig‘i kuchayib ketishining asl sabablari, uni davolashda yo‘l qo‘yiladigan va keng tarqalgan 6 ta xatoni ko‘rib chiqamiz.
- Sovuq havo tufayli tomoq og‘rib qoladi
Sovuq shamol va tomoq og‘rig‘i o‘rtasida bevosita bog‘liqlik mavjud emas. Ammo sovuq havo organizm ko‘proq issiqlik ishlab chiqarishiga turtki beradi va qon aylanish tezligini kamaytiradi. Bu esa immun tizimini biroz zaiflashtiradi va organizmning infeksiyalar bilan kurashish qobiliyatini susaytiradi.
- Tomoq og‘riganda muzqaymoq va sovuq narsalar yeyish mumkin emas
Muzqaymoq kuchli tomoq og‘rig‘ini yengillashtiradi. Chunki qon tomirlarining sovishi va torayishi tufayli tomoqning yallig‘langan qismi qon bilan ta’minlanishi kamayadi, natijada shish va og‘riqlar kamayadi. Biroq muzqaymoq virus va boshqa patogen mikroorganizmlarni bartaraf etmaydi va tomoqni davolamaydi.
- Tomoq og‘riganda antibiotiklar qabul qilish shart
Tomoq og‘rig‘ini faqat bakteriyalar keltirib chiqarmaydi, bunga yuzlab sabablar mavjud. Agar og‘riq virus yoki allergiya sababli yuzaga kelsa, antibiotiklar ta’sir qilmaydi. Shifokor nazoratisiz hamda hech qanday sababsiz antibiotiklarni qabul qilish mumkin emas. Ular faqat kasallik bakterial xarakterga egaligi aniqlangandan so‘ng mutaxassis tomonidan yozib berilishi zarur. Masalan, o‘tkir faringit antibiotiklar bilan davolanadi.
- Tomoq og‘rig‘ini davolamasa ham o‘zi o‘tib ketadi
Virusli infeksiya sabab yuzaga kelgan yengil tomoq og‘rig‘i bitta preparat yordamida 5-6 kun ichida o‘tib ketishi mumkin. Ammo kasallik davolanmasdan o‘z holicha tashlab qo‘yilsa, tomoq og‘rig‘i uzoq vaqtga cho‘zilib ketadi. Agar kasallik alomatlari bir hafta ichida yengillashmasa, baland harorat va boshqa noxush holatlar bilan birga kechsa, mutaxassisga murojaat etish lozim.
- Jismoniy faollikdan so‘ng tomoq og‘rig‘i kuchayib ketadi
Bu ham yanglish fikr. Yengil jismoniy faollikni talab etadigan tez yurish, suzish, yoga, velosipedda uchish kabilar immunitetni mustahkamlaydi va kasallikni yengishga yordam beradi. Kuchli va yuqori intensivlikni talab etadigan sport mashg‘ulotlarini esa chetga surib turgan maqul.
- Alkogol tomoq og‘rig‘ini davolaydi
Hatto juda oz miqdordagi spirtli ichimliklar ham organizmni suvsizlantirib yuboradi, bu esa tomoq og‘rig‘ini yanada kuchaytirishi mumkin. Bundan tashqari, spirtli ichimliklarni uzoq muddat iste’mol qilish immunitetni pasaytiradi va yuqumli kasalliklarga chalinish xavfini oshiradi.
Izoh (0)