“ПСЖ”нинг франциялик ҳужумчиси Килиан Мбаппе профессионал фаолиятидаги 17-совринни қўлга киритди.
Франция чемпионатининг 31-турида пойтахтнинг “ПСЖ” клуби муддатидан аввал клуб тарихидаги 12-чемпионликни қўлга киритди. Жамоа Лига 1 да 31 та ўйинда 70 очко тўплашга эришиб, муддатиган олдин бош совринга эга чиқди.
25 ёшли Мбаппе фаолиятида еттинчи марта Франция чемпиони бўлди. Мбаппе 2016—2017 йилги мавсумда “Монако” билан бир марта, “ПСЖ” билан олти марта шоҳсупага кўтарилган. Франциялик футболчи, шунингдек, пойтахт клуби таркибида уч бора Франция Кубоги ва Суперкубоги, икки марта Франция Лигаси кубогини қўлга киритди.
Франция билан Мбаппе 2018 йилги жаҳон чемпионатида ғолиб чиқди ва жамоага 2021 йилда Миллатлар Лигаси кубогини қўлга киритишда ёрдам берди.
Жорий мавсумда ҳужумчи барча мусобақаларда 44 та ўйин ўтказди. Унинг ҳисобида 43 та гол ва 10 та голли узатма бор.
Изоҳ (0)