Излаб топиш осон, арзон ва шу билан бирга ҳақиқатан ҳам соғлом бўлишга ёрдам берадиган сули ёрмасининг фойдали жиҳатлари сероб. Диетолог ва парҳез тутувчи инсонлар орасида ушбу маҳсулот анча машҳур. “Sports.kz” нашри хабар беришича, мутахассислар сули ёрмасидан тайёрланган бўтқанинг яна бир афзаллигини аниқлади.
Сули ёрмасидан тайёрланган бўтқа кўп мамлакатларда кенг тарқалган нонушта тури бўлиб, уни сув ёки сутда пишириш, шакар, асал, ёнғоқ, мевалар қўшиб истеъмол қилиш мумкин. Америкалик диетологлар аниқлашича, мазкур бўтқанинг илгари айтилмаган яна бир фойдали жиҳати аниқланди. Маълум бўлишича, сули ёрмаси жисмоний машғулотлар самарасини ошириши мумкин. Агар спорт машғулотларини бажаришдан аввал протеинли қўшимчалар ейишга одатланган бўлсангиз, уларнинг ўрнини сули ёрмаси босиши мумкин. Бундан ташқари, у моддалар алмашинувини яхшилайди.
Сули ёрмаси метаболизм жараёнини тезлаштиради. Спорт машғулотларидан кейин бир соат ичида истеъмол қилсангиз, машғулотингиз организмга самаралироқ бўлади, — дейди диетолог Жей Ковин.
Албатта, бунинг учун бўтқани сувда пишириш ва шакар, туз, сариёғ каби қўшимчалар солмаслик лозим.
Шунингдек, сули ёрмаси юрак-қон томирлари ҳамда ошқозон-ичак трактининг фаолиятини яхшилашга ёрдам беради.
Сули таркибидаги клетчаткалар ичаклар фаолиятини яхшилайди ва ундаги фойдали бактерияларни озиқлантириш учун зарур бўлган пребиотикларни ўзида сақлайди. Шунинг учун сули иммунитетни мустаҳкамлашга, сурункали касалликлар хавфини камайтиришга ва организмдаги яллиғланишни камайтиришга ёрдам беради, — дейди Триста Бест.
Сули ёрмаси таркибида мавжуд бўлган бета-глюканлар нафақат холестерин, балки қонда шакар миқдорига ҳам таъсир қилади, бу ичакларда овқат ҳазм қилишни секинлаштиради. Шундай қилиб, овқатланиш пайтида глюкоза даражаси сезиларли ошади. Ёрма эса уни камайтиришга ёрдам беради. Бу жуда муҳим хусусиятдир, чунки глюкозанинг ошиши организмни зўриқтиради, самарадорликни пасайтиради. Нормал глюкоза даражаси эса узоқ вақт давомида тўқлик ҳиссини беради.
Изоҳ (0)